Thuneituten mobile hmanga inbiakna leh data an tihtawp karah sawi hlawh tak, Pakistan inthlanah Ningani khan mi maktaduai telin sorkar thar siam turin vote an thlak zo ta.
Interior ministry chuan firfiaka chetna a thlen nasat avangin hetiang inkhuahkhirhna hi siam a ngai tih a sawi.
Cricketer atanga politics-a lut, Imran Khan-a prime minister atanga paih thlak a nih hnu kum hnihah inthlanpui hi huaihawt a ni.
Prime minister vawi thum lo ni tawh, Nawaz Sharif-a pawhin tun tum inthlan hi a chuh leh a, mi thiamte chuan Pakistan inthlana tling tur sawi lawk a harsat ber tum a nih thu an sawi hlawm.
Nikuma ei ruk thubuai avanga man, Khan-a chu lung inah awm mekin inthlan chuh thei lova tih a ni a, a party chuan internet tihthih chu ‘dawihzep thiltih’ tiin an sawi.
Engtikah nge result a hriat dawn hriat a ni lo va; mahse, chawlhkar hnih chhung vel chuan a hriat hman beisei a ni.
Inthlan lam hriate chuan vote a tlak tlem an ring hlawm a, hei hi PTI tlin theihna a tlem phah tura ngaih a ni a. Mobile service tihtawp hian voter tam takin polling station pan an harsat phah bawk.
Call leh data service hi vote thlak tan hma minute 10 atanga tihtawp a ni a, wifi network chauh hman theih a ni.
Lahore khawpuia cheng tam tak chuan internet a awm loh avangin vote thlak tura taxi koh an harsat phah tih an sawi a. Thenkhat chuan an chhung leh thiante nen a huhova polling station pan an tumnaah inbiak theih loh chuan thil a tibuai tih an sawi bawk.
Interior ministry thupuangtu chuan, “Tun hnaia ram chhunga firfiaka chetna thlengah nunna hlu tak tak chân a ni a. Venhimna tihkhauh a tul a ni,” a ti ve thung.
Pakistan-ah hian hel chetna tam hle mah se vote thlak ni takah hian thawm a awm lutuk lo thung a. Hmar lama Dera Ismail Khan-ah erawh bomb hmanga an chuanna lirthei beih a nih avangin police pali an thi a. Chhimthlang lama Balochistan province-ah pawh thil puak a awm nual a; mahse, thi an awm lo.
Nilaini khan Balochistan-ah hian candidate-te pisa beih a lo ni tawh a, mi 28 vel an thi.
Vote thlak nia internet leh inbiakna tihtawp hi Pakistan People’s Party (PPP) hruaitu, prime minister thah tak, Benazir Bhutto-i fapa, Bilawal Bhutto Zardari pawhin a sawisel a, ‘rang taka tinung’ turin a ti.
Ram pumah inrin niin polling station-te chu khauh taka ven a ni a. A luhna leh a chhehvel chu sipaiten ralthuam nen an veng a ni.
Inthlan laia buaina a awm loh nan Afghanistan leh Iran nena an inkalpawhna pawh kea kal leh bungraw phurh tan khar vek a ni tih Pakistan foreign ministry chuan a sawi.
Pakistan-ah hian inthlan bawrah hian thu dik tawk lo thehdarh awm fo thin tihtawp nan internet service tihtawp hi tih thin a lo ni tawh.
Inthlanah hian mi maktaduai 128 velin vote an thlak thei a, heng zinga a zahve vel hi kum 35 hnuai lam an ni a. Inthlan chuhtu mi 5,000 chuang awmin heng zinga 313 chu hmeichhia an ni a. Heng mite hian National Assembly-a thutna 336 awmah 266-a thu turin an chuh a ni.
Pakistan Muslim League (Nawaz) (PML-N) leh PPP chu tun tumah hian inbeina party pahnih an ni.
Hetih lai hian Khan-a kaihhruai Pakistan Tehreek-e-Insaf (PTI) party pawh an la awm a, anni hi an chhinchhiahna atana cricket bat hman an tum chu phalsak loh an ni.
Hetiang a nih avang hian PTI-in a thlawp independent candidate-te chuan chhinchhiahna atan a remchang ang – calculator, electric heater leh dice te an hmang a. Pakistan-ah hian vote nei zinga 40% vel zet chu ziak leh chhiar thiam lo an nih avangin chhinchhiahna hi a pawimawh hle a, an hman thin pangngai phalsak an ni lo hi PTI tan chuan a pawi pha hle tura ngaih a ni.