Africa Cup of Nations (Afcon) 2023 khelh mek chu a hmawr an bawk hnai ta a, nilai zan khan semi-final khelh zawh niin final-a intum tur hriat theih ta. Pathianni hian Abidjan khawpuiah vawihnih champion tawh Ivory Coast leh title pathum hlawhchhuak tawh Nigeria an insu dawn.
Kumin Afcon hi official-in 2023 Africa Cup of Nations tih a ni a, a lam tawiin 2023 AFCON emaw CAN 2023 an ti a, sponsorship avangin Total-Energies 2023 Africa Cup of Nations tih a ni bawk.
- Ivory Coast 1-0 DR Congo
Elephants final luhna goal awmchhun hi second half minute 65-a Sebastien Haller-a tihluh niin, Haller hian lei vit zawngin a hlap zet a, a ting chho chuan Leopards goalkeeper Lionel Mpasi khumin goal-ah a lut ta a ni.
Borussia Dortmund striker hian chawlhlawk hma chiahin goal thun theihna hun remchang hmasa a nei a, mahse, a hun tha neih bawhpelhin a tauhlut lo a; a goal hnihna khung tur pawhin chance a nei tho a, hei pawh goal ban sirah a petchhuak hlauh a ni.
DR Congo lam pawh hian hun tawp hnaih lamah an siphurh sut theihna hun remchang an hmu a, Meschack Elia leh Simon Banza-te’n an chance tha hmuh an hloh ve ve.
Ivory Coast hian group stage an luh hma khan laklawh zetin tournament tir lamah an boss Jean-Louis Gasset an ban a; head coach nghet an lakluh hmaa team lo enkawl lailawktu atana mawhphurhna an pek interim boss Emerse Fae ho pawhin last four an luhna kawngah goal an khung pur pur lo a, Senegal leh Mali an hnehna goal-te pawh kha hun tawp lama an sualchhuah hram hram a ni.
Tunah chuan Nantes, Reading leh Nice midfielder hlui Emerse Fae hoin a tum thumna atana khawmualpui title la thei dinhmunah Elephants an lut a, African palian dang Super Eagles lakah hmabak lian an la nei.
Kum 40 mi lek Fae enkawlna hnuaia final lut Ivory Coast hi kum 2006 tournament thlengtu Egypt hnu lama a thlengtu ni chunga Afcon final chuangkai leh thei hmasaber niin, khami kuma champion Pharaohs kha mahni kawtkaia Afcon trophy la thei hnuhnungber an ni nghal a, Ivorian-ho hian Pathianniah Aigupta mite tih theih ang tih theih ve an tum dawn a ni.
Elephants hian kum 1992 leh 2015 khan Africa Cup of Nations title hi an lo hlawhchhuak ve tawh a, Pathianni zan final-a an chak chuan vawithum champion thei an ni ve tawh ang.
Nilaini vek khan Abidjan khawpuia 2023 Afcon semi-final hmasa zawkah Super Eagles an vannei a, extra-time khelh zawhah pawh sikhat ve ve thuna team pahnih an la inhneh cheu avangin penalty an pet a, Nigeria laka tlawm fo tawh Bafana Bafana bawk vanduai zawkah an tang leh ta a ni.
Bouake khuaa Stade de la Paix inkhel hun pangngaia goal hnih lut pawh hi penalty atang ve vea lut niin, chuti a nih chuan he match-a goal riat lut hi penalty pet atang veka chhuihluh tihna a ni!
Second half minute 67-ah William Troost-Ekong chuan penalty atangin Nigeria hmahruaina goal a khung a; he goal khat hi Super Eagles-in final an luhpui thei tawh mai dawna a lan hnu minute 90-na a kal mek laiin South Africa lamin penalty an hlawhchhuak ve leh nawlh a, Teboho Mokoena chuan Bafana Bafana siphurh sutin, extra time khelh zui a ni.
Minute 30 hun pekbelhah hian goal a lut lo a, thil langsar thleng hmuh tur awm chu minute 115-a South African defender Grant Kekana hnawhchhuah a ni kha a ni deuh mai a, mahse, Nigerian-hoin a tam zawk nihna an chhawrtangkai zo ta bik chuang lo.
Penalty hmanga pawhthen an ngai a, Kelechi Iheanacho chuan chakna goal khungin, kum 2013 hnu lama a vawikhatna tur leh an ram chanchina khaw-mualpui title vawili an lakna tur beiseiin Pathianni zan hian final-ah tournament thlengtu Ivory Coast an hmachhawn thei dawn ta a ni.
Nigeria hian South Africa lakah Nations Cup record tha zet an vawngnung zel a, he competition-a vawithum an lo insut tawhah an la chak fai vek a, chu’ng zingah chuan kum 2000-a Lagos rama semi-final match kha a tel nghe nghe.