Punjab-a nupa tuak thar, kum 33 zeta inthlaute chu miin an ngaihven em avang leh an nu leh pa leh an chhungte atang pawha dodalna leh duh lohna an tawn an hlauh avangin court-ah venhimna an dil hial a, court pawhin venhimna pe turin a ti.
Punjab & Haryana high court chuan Punjab police hnenah Sangrur khuaa tuak tharte hi an dil angin venhimna pe turin a ti a. Kum 67 zeta upa, Shamsher Singh leh kum 24-a upa, Navpreet Kaur te hi Balian khua niin Chandigarh gurdwara-ah January thla khan an innei a. An inneih thlalak hi social media lamah a darh chak hle a, sawi a hlawh hle a. High court-ah kalin an chhungte pawhin an lakah pawi an khawih theih mai an hlauh avangin venhimna hi an dil ta a ni.
“He inneihna hi an chhungten an pawmpui thei lo va, HC-ah kalin an nunna atan pawh an chhungte ve ve hi an hlauhawm thei tih an sawi a. February 4 khan court chuan Sangrur leh Barnala district SSP te chu venhimna pe turin a ti ta a ni,” tiin counsel Mohit Sadana chuan a sawi.
An nupa hian an thlalak darh leh court an thlen chungchangah engmah an sawi lo va; mahse, an counsel hian dan ang thlapin an inneihna hi an kalpui tih a sawi a. “Puitling ve ve an ni tawh a, an kawppui tur chungchangah hian duhthlan theihna an ni a. Dan angin an inneih a, nupa anga khawsa satliah mai an ni lo,” Sadana chuan a ti bawk.
Sangrur SSP Sandeep Garg pawh court hian thu a pek ngei thu leh dan angin an nupa hi an veng dawn tih a sawi a. “Police chuan thupek kan hmuh angin venhim hi kan hna a ni mai,” a ti.
Shamsher-a chhungte hian he an inneihna hi an pawm thei lo va; mahse, an nupa hi chuan chutiang a awm lo niin an counsel kaltlang hian an sawi thung.