Aizawl: LESDE Minister Lalnghinglova Hmar leh Ministry of Skill Development & Entrepreneurship (MSDE) enkawltu Minister of State, Rajeev Chandrasekhar te chu nimin khan New Delhi-ah an inkawm.
Chandrasekhar chuan Mizoram sorkar tharin skill development lama hmalak a tum tak tak chu lawmawm a tih thu a sawi a. Thil kalphung pangngai pet pet ni lo, Mizoram mil project siama an thehluh chuan a hlawhtlin theih nan theihtawpin a lo pui thu Lalnghinglova Hmar a hrilh.
Sorkar laipuiin skill development leh entrepreneurship lama hma a lak nasat thu sawiin, hei hi India ram puma kalpui tur a ni a, chutih laiin mahni ram awm dan leh ram mite thiamna azirin an siam rem thiam tur a ni tiin, a sawi bawk.
Lalnghinglova Hmar chuan Chief Minister Lalduhoma hova ‘hand holding policy’ kalpui tura committee hranpa a din thu te, chumi kawng chuan MSDE chu nasa taka an behchhan tur thute a hrilh a; Chandrasekhar chuan Mizoram hmachhawpte chu a ministry kal dan nen thil inmil a nih thu a sawi.