Aizawl : Mamit Field vengah nimin khan Road Safety Month hawnna hun an hmang a, Addl DC V. Laldinsanga’n a hmanpui.
Addl. DC chuan lirthei a kum tellin a pung chho tih sawiin, dan leh thupek zawm thatin chetsualna tam tak pumpelh theih a nih thu a sawi a. Traffic police duty an din loh avanga dan zawm tullo anga ngaihna chu a thalo hle tih sawiin, engtiklai pawhin dan chu dan a nih anga zawm a tul thu a sawi.
Lirthei khalhtu leh kea kawngpui zawhtu te tan dan zawm tur chi hnih a awm thu sawiin, hengte hi tha taka zawm tlan chu himna tur a nih avangin Road Safety Month chu District chhung mipui te chu dan leh thupek zawm thar lehna atana hmang vek turin a sawm a ni.
Mamit SP Lalthangpuii Pulamte kaihruaiin in lirthei leh a khalhtute himna tura thutiam kalkhawm ten an la a. District Road Safety Committee-in ruahmanna a siam angin Road Safety Month denchhen hian lirthei leh a khalhtute tana fimkhurna tur hrang hrangah hmalak chhoh a ni dawn a. Road Safety Awareness Drive, DIET, Govt. Mamit College, Govt Mamit High School leh Higher Secondary School-ah te neih a nih dawn bakah No Tolerance Drive ( 12th -17th) February chhungin Lirthei check runpui DTO Mamit kaihruaina-in Police leh Excise te nen neih a ni ang.
Mamit-a Road Safety Month hawnnaah hian Mamit khawpui chhunga sawrkar department hotute, lirthei khalhtu Association hrang hrang, tlawmngai pawl aiawh leh khawtlang hruaitu aiawhte an tel a ni.