Aizawl: Transport Director Er. R. Lalrammawia’n mangan thlak khawpin lirthei chhiah pe tha lo an tam thu a sawi a, lirthei neituten chhiah pek an ngaihsak a tul hle tih a sawi.
He thu hi nimina GIG Motors-in an department hnena car an hlanna inkhawm tawi neihah a sawi a, lirthei chhiah pe tha lo, black list-a dah 5,800 chuang an awm a, heng bakah lirthei 5,000 chuang chu chhiah an batte pe fel tura ngaichan leh mek an tihte, thla thum a ral hnuah pawh an inching fel lo a nih chuan blacklist-ah dah an ni leh dawn tih sawiin, chhiah pe tha lo leh driving license thi chunga lirthei khalhten chetsualna an tawhin insurance dil kawngah harsatna an tawk thin a, hengte avang hian lirthei neitute chu chhiah pe tha turin an ngen tih a sawi.
Transport department hnena Maruti Ciaz car hlantu, GIG Motors CEO John Lalpeka chuan sorkar sum harsatnate an hriatpui a, khua leh tui tha nih an duh avangin tangkai tana an hman atan transport department hnenah hian car hi an hlan tih a sawi a, lirthei inhlan hi nikum lam atanga buaipui tawh a ni a, sorkar atanga phalna an hmuh veleh a takin an in hlan fel thei ta tih a sawi.
GIG Motors-in transport department hnena an hlan hi Rs. nuai 13 man a ni.