Sorkarin a enkawl, Steel Authority of India Limited hmun pakhat, Durg district, Chhattisgarh-a mi chu nimin khan a puak a, hna thawktu mi pakuain nunna an chân a, mi dang 12-in hliam an tuar bawk a, an zinga mi 6 hi an na hle niin police-te chuan an sawi bawk.
“Hliam tuarte hi an zavaiin an na viau hlawm a, district hospital-ah dah luh tawh an ni a. An dinhmun thlirin thi zat pawh hi an pun mai a rinawm hle a ni,” tiin Durg-a inspector general of police G.P.Singh chuan a sawi.
He chhiatna hi nimin chawhma dar 10:30 vela thleng niin Coke Oven Battery Complex No. 11-ah gas pipe line a puak niin SAIL chuan an sawi a. Hliam tuarte hi damdawi in thlenpui nghal an ni a, kangmei chhuak pawh hi rei vak lo hnuah an thunun thei nghal a. Police pawh rang takin a hmun an thleng nghal bawk.
Nikum November khan Unchahar, Uttar Pradesh-a National Thermal Power Corporation (NTPC) Limited plant-ah tuna thil thleng ang hi a lo thleng tawh a, mi 43 lai an thi a. Member pali awmna inquiry committee chuan thawktute inthlahdah vangah an puh a, tun tuma pawh chhui a ni ang.