Aizawl: February 20, 2024-a Mizoram State Day lo thleng tur pualin Aizawl Sipai Lammual-ah ram pum huap chawnghei tawngtai beihpui, ‘Ninevi Challenge’ neih a ni dawn.
Nimin khan State Day of Prayer Committee (SDP) chuan Aizawl Press Club-ah thuthar thehdarhtute an kawm a. He hun an Working Chairman F Rodingliana, P&E Minister chuan ‘Ninevi Challenge’ neih a nih tur thu hi a puang a. February 5, 2024 khan mi thahnemngai intelkhawmten Chief Minister Lalduhoma chu kawmin, heta an sawihona atangin State Day of Prayer Committee din an rel tih sawiin, “Chief minister duhsakna hnuaiah he ni hi ram pum huapa sual ngaihdam dila chawnghei tawngtai beihpui, ‘Ninevi Challenge’ atana hmangin AR Ground-a buatsaih turin ruahmannaa kal ta nghal a ni,” a ti.
SDP working chairman an ruahmannate a sawi danin, State Day-ah hian AR Lammualah zaihona leh tawngtai hona zalen taka neih tur a ni a. AR Lammual pan tur hian Sikulpui kawnah, Vaivakawna, Chanmari kawnah te innghah tur a ni a, chung hmun atang chuan a ruala kal chhuakin chawhma dar 11 ah kawng zawh buatsaih tur a ni a. Kawng zawhnaa tel remchang lo tan Lammual hi mahni awmna hmun atang pawha pan khawm theih a ni bawk.
Chawnghei tawngtai beihpui hi Chief Minister Lalduhoma’n chhun dar 1-ah a hawng dawn a. Thupui pathum neiin hun thumah then a ni dawn a; hun khatnaa thupui tur chu ‘Sual ngaihdam dilna (Ninevi Challenge) niin, thupui hi Upa Dr PC Biaksiama, Gen. Secretary, SDP-in a sawi hawng dawn a. Hun hnihna thupui chu ‘Pathian hnena lawmthu sawina’ niin, Frederick Lalrindika’n a sawi hawng dawn a, hun thumna thupui chu ‘Inhlan tharna/Inpumpekna’ tih chu Upa Dr R Vanlalzauva’n a sawi hawng ve thung ang.
Lammuala chawnghei tawngtaia kal turten mahni rilrua a lan dan ang angin saiip/zothuam inbel theih a nih bakah, saiip puan nei remchanglo te tan Lammual gate-ah lak theih a ni dawn a. Mahni rilrua a thawh dan azirin thuziak hrang hrang – poster leh placard te, flag te ken theih niin, a duh tan Kraws te pawh put chhuah theih a ni bawk.