Prime Minister Narendra Modi chuan Zirtawpni khan prime minister hlui pahnih, PV Narasimha Rao leh Chaudhary Charan Singh leh agricultural scientist MS Swaminathan te chu India-a civil mite chawimawina sang ber, Bharat Ratna dawng tura thlan an ni tih a puang.
Bharat Ratna award hi kum khatah mi pathum zel hnena hlan thin a ni a. Kuminah erawh sorkar hian mi panga hnenah a hlan dawn a, an zingah hian BJP hruaitu hlun, LK Advani leh Bihar chief minister hlui, Karpoori Thakur te an tel.
Bharat Ratna hi kum 1954 atanga pek tan a ni a, an hnam, an ei zawnna, an nihna leh hmeichhia/mipa an nihna anga teha dawng tura thlan a thiang lo va. Thil rop[ui bik tite chawimawina niin mihringpuite tana hna thawk nasa zel thlan an ni.
Chawimawina dawng turte hi prime minister-in president-in a rawtna a thlen a. A dawngtute hnenah hian president-in a hming a ziah hnan Sanad (certificate) leh medal hlan thin a ni.
- PV Narasimha Rao
PV Narasimha Rao-a hi June 21, 1991 atanga May 16, 1996 thleng prime minister a ni.
Kum 1921-ah Andhra Pradesh-a Karimnagar-ah puangin Osmania University, Hyderabad, Bombay University, leh Nagpur University-ah lehkha a zir thin.
Thlai chin lama mi thiam a nih bakah advocate a ni bawk a, Andhra Pradesh chief minister a ni tawh bawk.
January 14, 1980 leh July 18, 1984 inkarah external affairs minister a ni a, July, 1984 leh December, 1984 inkarah home minister niin defence minister pawh December, 1984 atanga September, 1985 thleng a ni tawh bawk.
- Charan Singh
Uttar Pradesh-a Meerut-a kum 1902-a piang, Charan Singh-a hi July 28, 1979 leh January 14, 1980 inkara prime minister a ni.
Kum 1937-ah a vawi khat nan Uttar Pradesh Legislative Assembly member atan Chhaprauli bial atanga thlan tlin a ni a. Kum 1946, 1952, 1962 leh 1967 khan a bial ngaiah thlan tlin nawn leh a ni bawk.
Uttar Pradesh chief minister pawh vawi hnih, kum 1967 leh 1970-ah a ni tawh bawk.
- MS Swaminathan
Kum 1925-a piang, MS Swaminathan-a hi mi tam takin an hriat dan chuan ‘Father of the Green Revolution in India’ tih a ni.
Maharajas College, Thiruvananthapuram atangin Zoology-ah BSc degree a nei a, Coimbatore Agricultural College atangin Agricultural Sciences-ah degree a nei bawk.
Indian Agricultural Research Institute (IARI) atangin Agricultural Sciences (genetics & plant breeding)-ah MSc degree a nei a, Cambridge University, UK atangin PhD degree a nei bawk.
- LK Advani
BJP hruaitu, LK Advani hi 1986-90, 1993-98 leh 2004-05 khan BJP national president a lo ni tawh.
Kum 30 dawn parliament member a ni a, home minister a nih phawt hnuah Prime Minister Atal Bihari Vajpayee-a sorkarah khan kum 1999 leh 2004 inkarah deputy prime minister a ni bawk.
- Karpoori Thakur
Bihar-a Samastipur district-a kum 1924-a piang, Karpoori Thakur-a hi an state chief minister vawi hnih a ni a, December, 1970 leh June, 1971 inkar a nih hnuah December, 1977 leh April, 1979 inkarah a ni leh.
An state chhunga tun lai thlenga an hruaitute ngaihsan leh entawn a la ni a, heng zingah hian Chief Minister Nitish Kumar leh RJD president Lalu Prasad Yadav te pawh an tel.