Parliament session neih mekah nimin khan Rajya Sabha MP K.Vanlalvena chuan India sorkarin Indo-Myanmar ramri hung kalpui a tum chu Mizoram mipuite duh dan a nih loh thu leh, he thutlukna hian Zoram mipuite a thawng hle tih Union Home Minister Amit Shah a hnenah ziakin a thlen.
Rajya Sabha MP K Vanlalvena chuan British sorkarin dik lo taka ramri siamsak a nih avangin Zofate chu India, Burma leh East Pakistan-ah te tihluihnaa then darh an nih thu leh, he ramri dik lo tak hi India independence tirh atanga tun thlenga siam that la ni lo hi hnam anga inrahbehna a nih thu union home minister hnenah thlenin, he ramri dik lo hi siam thata rorelna pakhat hnuaia awm an nghah reng laia ramri hung tumna lo awm ta hian Zofate a barakhaih thu a sawi bawk.
India independence hnu kum 75 chhung zalen taka an lo inkalpawh thinna Free Movement Regime tihtawp tumna pawh hian, ramri bul hnaia chengte ve ve tan harsatna nasa tak a siam tur thu a thlen bawk.
Mizoram MP chuan Indo – Myanmar ramri hung hian ramri kal tlanga dan lova sumdawnna hrang hrang, drugs leh ralthuam tawlh ruk thin te hi a tihtawp beiseina avang a nih chuan, fencing hian chung sumdawnna te chu a tawp phah dawn lo tih Bangladesh Border fencing siam zawh tawh atang hian a hriat theih thu leh, Bangladesh ramri kaltlanga ralthuam tawlhruk vawi tam tak ramri vengtuten an man thin dan atang hian a lang fiah tih sawi bawkin, “Myanmar nena kan inrina hi hung a nih chuan kan sangha manna tha tak, km 500 laia sei ramria luang mek kan lui te chu ramri pawnah dah a nih dawn avangin kan hloh dawn tihna a ni a. Hengte avang hian Indo- Myanmar ramri hung tumna hi Mizoramah tih loh ni se,” tiin Shah-a hnenah hian a thlen a ni.
Parliament session neih dawna All Party Leaders meeting-ah Mizoram MP hian Indo-Myanmar fencing siam tumna hi thulh tura ngenna a lo sawi chhuak tawh a. Session kallai mekah Rajya Sabha-ah au chhuah pui turin dilna vawi li lai a thlen chungin hun pek a ni lo a. Lok Sabha lamah Indo-Myanmar fencing siam tum a nih thu te Central Minister ten an sawi chhuah lai a, chumi chungchang sawi chhuah phalsak a ni lo chu North East tlangmite dikna zah lohna ni hiala a ngaih thu K.Vanlalvena chuan a sawi bawk.