MLA Conference Hall, Annexe Building-ah nimin khan Rural Development Minister Prof. Lalnilawma hovin RD Department Officer te an hmalakna thlirletin an thukhawm.
RD Minister chuan ram hmasawnna tura Department pawimawh ber an nih thu sawiin, an bial, thingtlang mipuite khawsakin hma a sawn em, danglamna a thlen em, tihah ngaihtuahna an hman fo a pawimawh thu a sawi a. An department leh schemes te chiang tur leh scheme hnuaia fund te chu dik tak leh a nihna ang taka hmang thin turin a chah.
India ram pum huap Rural population chu 60% a nih laiin, Mizoram chu 48% vel rural area awm an nih thu sawiin, RD Minister chuan “chuti chung chuan kan ram thingtlang leh khawpui inkar chu a la inthlau hle a, thingtlang hmasawnna tur hian kan pawimawh lehzual a ni” a ti.
RD Minister chuan thingtlang mipui nun chawikan a nih theih nan rilru thar leh tha thar nen theihtawpchhuaha, khawpuia hmasawnna leh thil thar awmte chu thingtlangah pawh a awm ve theih na tura tan an lak a pawimawh thu a sawi a. Retheihna leh tam umbo tura UN Sustainable Development goals-in a phut anga a tihlawhtling theitu pawimawhte zinga mi an nih angin theihtawpchhuah zel turin kalkhawmte chu a chah.
Prof. Lalnilawma chuan “Kan hmalakna chu thil tereuhtete aiin thil liantham leh hriat tham deuh, khawtlang tan pawha rohlu ni thei se la” a ti a. Department dangte nena thawhhona convergence dap uar tur leh mipuite tana thawk an nih ang ngeia officer biak nuam leh hawihhawm tak ni turin kalkhawmte chu a chah bawk.
RD deptt. hmalakna thlirletna hun hi hun hniha then niin, thupui hrang hrang an zirho nghal a. RD block hrang hrangte RD schemes hnuaia an hnathawh dan te sawhovin, zawhna leh chhanna hun an hmang bawk a ni.