Aizawl: MNF National Core Committee member, Er R Rohmingliana chuan MNF chu a nghahchhan lungphum (foundation) a dik avangin party dangte chhungrila inbeihna ang a awm ve lo niin a sawi.
Zirtawpnia Mizo Hnam Runah thu a sawiah Er R Rohmingliana, MLA chuan in sa turin a nghahchhan lungphum a pawimawh ang bawk hian Mizorama political party-te pawhin nghahchhan lungphum an nei vek chu chhutchian a ngai tih a sawi a. Congress party chu vai rama intan, central-a an hniam chuan Mizoramah pawh an hniam zel a. BJP pawh Congress ang tho an nih thu a sawi.
Mizorama sorkar kengkawhtu ZPM chu eng ang nge an nih hriatchian a pawimawh tih sawiin, “An innghahchhan lungphum chu party hrang hrang kalkhawm an ni a. Founder president pawh an nei lo. An MLA-te pawh inthlan dawna an sawm khawm chawp an ni, an kal thui vak ka ring lo,” a ti.
MNF chungchang sawiin, “MNF chu Mizopa chhul chhuak, Mizorama din, ‘Pathian leh kan ram tan’ tia din a ni,” tiin, tluksawp lai awm mah se, engtik niah emaw chuan a thochhuak leh dawn a. MNF chu a nghahchhan lungphum a dik avangin party dangte chhungrila inbeihna ang hi a awm ve loh thu leh a foundation a that hle rual hian a dawttua hruaitu turte an pawimawh tel bawk tih a sawi.