India hmar lam state pakhatah thuneituten dan lova mosque sak nia sawi nawr chhiat an tumna lama tharum thawhna thlengah mi pali an thi.
Tharum thawhna hi Uttarakhand-a Haldwani khuaa thleng niin police chuan ‘dan lova mi rama in sa’ an vaina lama an chet chhuahna a nih thu an sawi.
Thuneitute hian dan lova in sakte chu nawr chhiat an tum a, heng zingah hian mosque leh a bula madrassa (sakhaw thil zirna) pawh a tel.
Mosque-a tawngtaia awm Muslim-te erawh chuan dik lo takin bitum an ni bik niin an insawi ve thung.
Ningani tlaia thil thlengah hian nawr chhiat duh lotu mipui za tel leh police thahnem takin hliam an tuar.
Video thehdarhah chuan lirtheite pawh hal a ni a, lungin police vawm an ni a, police hian mittui tlakna hmangin an kap let ve bawk.
Curfew puan a ni a, state sorkar chuan boruak thunun nan ‘shoot at sight’ thupek a chhuah nghal bawk.
He thil hi Haldwani-a Banbhoolpura venga thleng a ni a. He district-ah hian nikum January pawh khan mi 50,000 chuang, a tam ber Muslim-te chu dan lova Indian Railways rama awma in saa puh an nih avangin thiahsak tum an lo ni tawh a. A hnuah India-a court sang ber chuan thiah an tumna hi a tikhawtlai leh ta thung.
Thuneitute chuan tun tuma an chet chhuahna hi high court thupek a nih thu leh heng lai vela dan lova hmun luahtute chu nawr chhuak tura tih an ni tih an sawi.
District Magistrate Vandana Singh chuan mosque leh madrassa hi sorkar ramah dan lova din a ni a, sakhaw hmun tih engmah ziah luh a awm lo bawk tih a sawi.
“He chet chhuahna hian tute bik mah tum a nei lo va. Engmah buaina awm lova bul tan a ni a, mipuiin an rawn chim thut a, tharum thawhna a thleng zui ta a ni,” tiin Singh-i chuan a sawi a, thuneitute hian a hma daih tawhin mosque hotute hnenah nawr chhiat an nih tur thu an lo hrilh tawh tih a sawi bawk.
Tual chhung mite erawh chuan hetiang a nih loh thu an sawi a, mosque hi court-in thutlukna tawp a siam hmaa hetianga nawr chhiat tum a nih thu an sawi thung.
“Thuneituten nawr tluk tumin an lo kal a, court-in a ngaihtuah leh hun nghak tura ngen an lo ni a; mahse, an ngaithla duh lo. Court hian thutlukna tawp siam tawh ni sela keini atangin lo dodalna engmah a awm lo vang,” tiin tual chhunga councillor pakhat, Shakeel Ahmad chuan Indian Express chanchinbu hnenah a sawi thung.
Tun hnaiah India-ah hian mosque nawr thluk hi a awm nual a, boruak pawh a nei hat zel.
Muslim-te chuan dik lo takin Prime Minister Narendra Modi-a kaihhruai Hindu nationalist sorkar hian an bitum niin an sawi a, inthlanpui neih nan thla hnih chauh la awm lai hian a sakhua chu vawrh lar a tum niin an puh bawk a. Sorkar erawh chuan chutiang a nih loh thu an sawi ve thung.
Zirtawpniah pawh khan Haldwani-ah hian boruak a la tang hle a, thuneituten internet service titawpin tumah chhuak lo turin an ti bawk.
Banbhoolpura-ah chuan sikul khar a ni a, police tam tak dah niin boruak thlithlai reng a ni.
Uttarakhand-ah hian tun hnai lawk khan Uniform Civil Code (UCC) a pawm a, an state chhunga cheng zawng zawngten dan inang khan an hmanna tur a ni.
India-ah hian sakhaw hrang hrangin tih dan bik an nei a, a bikin inneih, inthen leh ro inchunah mahni pual dan hi a lal hle a, hei hi awm tawh lovin an state-ah chuan sorkarin dan a siam angin khairual tum a ni tawh ang.
Uttarakhand-a Muslim-te chuan UCC hi an duh lo hle a, Islam dan an zawm thin palzutsakna niin an sawi.