Aizawl: Mizoram State Commission for Women (MSCW) chuan tun hnaia Mizo hmeichhia ni ngeia hriat pakhatin social media kaltlanga sex video a tihchhuah chungchangah thubuai an ziak lut a, hemi chungchang hi chhui zuia man ngaite laka hma la turin cyber crime police a hriattir.
MSCW chuan social media-a ualau taka mipat hmeichhiatna hmang lai phochhuah leh thehdarh hi hmeichhe zahawmna tihbawrhbanna nasa tak a nih thu tar langin, “Video viral atanga a lan danin he hmeichhia hi Instagram-ah chuan ‘pui_puii_chhakchhuak’ aka ‘zolanu’ tih niin a lang,” an ti a, a video hi sum hmuh nan a hmang ni ngeia ngaih theihin a live sex video en duh tana man chawia en theihna a tlangzarh hmasa nia a lan thute, hetiang thil hi dan pal zutna lian tak a nih avangin thubuai an ziak lut tih an tar lang.
MSCW chuan hetianga mipat hmeichhiatna hmangtu leh a hmanpuitu bakah social media account/platform lo hmantirtute lakah hian thubuai a rang thei ang bera ziak luta chhui zui ngai leh man ngaite lakah dan anga hma la zui vat turin Superintendent of Police, Cyber, Aizawl, Mizoram chu a hriattir a, hmalak dan kimchang hi he order tihchhuah a nih atanga ni sarih chhunga an hnena theh lut turin a beisei tih a tar lang a, Mizo hmeichhiate chu hetiang dan palzutna a thlen tawh loh nan social media hman danah lo fimkhur turin a ngen a ni.
Central for Environment & Social Justice Mizoram pawhin nimin khan social media-a hursualna zawnga chet chungchangah hian Cyber Crime Police station-ah FIR an thehlut a, hemi kawnga inhnamhnawihna nei lian tak account neitute chungah dan anga hrem an nih theih nana hmala turin an ngen a, heng thil tha lo social media-a tar lan hian khawtlangah nghawng thra lo tak a neih avangin Mizo mipuite chu heng sualnate hi do turin an ngen bawk.