USA a infiamna lar leh ngaihhlut hlawh tak National Football League (NFL) a player tha berah Baltimore Ravens quarterback Lamar Jackson chu a vawi hnih nan thlan a ni.
Baltimore Ravens player pawimawh Lamar Jackson hi kum 2019 khan a vawi khat nan NFL MVP atan thlan a ni a. Kum 2023 a NFL player tha berah thlan a ni leh bawk. NFL MVP 2023 thlannaah hian Jackson hi a sang fal hle a, vote awm zawng zawng 50 atangin vote 49 zet a hmu a, vote khat chiah a hmu lo. A vote hmuh loh chhun hi Buffalo Bills quarterback Josh Allen-a’n a hmu ve thung.
Jackson hi Super Bowl era-ah MVP award vawi hnih chin dawng theio pakuana a ni a. NFL khel mek zingah he chawimawina vawi hnih chin dawng thei pathum zinga pakhat a ni a. Ani bakah hian season liam taa chawimawina dawngtu Patrick Mahomes leh chawimawina vawi li lo dawng tawhtu Aaron Rodgers te an awm.
Kum 27 mi Lamar Jackson hian kum 2023 khan Baltimore Ravens-ah contract thar a ziak a, NFL player hlawh hnem ber a ni nghe nghe a. A contract hlut zawng hi US Dollar 260m zet a ni. A khelh that theih em vangin player hlawh hnem ber a ni a. NFL a player tha berah thlan a ni leh bawk.
NFL chawimawina semchhuah takah hian Cleveland Browns Coach Kevin Stefanski chu coach tha berah thlan a ni a. Comeback Player of the Year-ah Cleveland Browns quarterback Joe Flacc, Offensive Player of the Year-ah Christian McCaffrey (San Francisco 49ers running back), Defensive Player of the Year-ah Myles Garrett (Cleveland Browns defensive) Offensive Rookie of the Year-ah CJ Stroud (Houston Texans quarterback) leh Defensive Rookie of the Year-ah Will Anderson Jr (Houston Texans defensive end) te thlan an ni bawk.