Central sawrkar chuan union home minister lo puan lawk ang ngeiin nimin atang khan zokhawthar a khawchhak lam nen kan inkal pawhna gate a khar ta. Motor a bungraw phurh luh chu sawi loh, ke a mihring leia inkalpawh pawh a khap nghal hmiah a ni. Ramri chhehvel nun a buai nghal vek a. Engtinnge hma a lak zui dawn hriat ani ta lo.
He ramri khar hian kan nunphung, eizawnna a nghawng nasat turzia pawh Mizoram mipui chuan kan hre vek a. Kan unaute nena kan inkara inkalpawh khap kan niha a nghawng tur hi rapthlak tak a ni dawn. Ramri a chengte chu sawi loh, Aizawl khawpuia khawchhak lam bungrua leh mamawh ilo zuara khawsa te engtinnge an awm tak ang. Nitin mamawh hi khawchhak atanga lokal nge tam ang India atanga kan lak luh tih hi chhut tham a ni a. Eizawnna engzatnge tawp dawn ang le. Ramri a inkalpawh tawna mamawh inban tawn tan chuan he hmalakna hi a rapthlak takzet.
India sawrkarin a puan tirh atanga kan huphurh sa, tih loh tir dan a awm lo’m ni kan tih vawng vawng chu dimna tel hauh lovin hma an la ta pawp mai chu a ni a. Mipui hmangaih aia ram duh zawk sawrkar chetna lam a ang mah mah a a ni.
Union Home minister Amit Shah chuan Mizoram leh Nagaland a NGO ten an duh loh thu an sawi lah chuan helai NGO tlemte duh dan chu engmah ani lo a lo ti hmiah tawh anih kha. Kan pi leh pute ram min lo dinsak kan tih ve ah hian kan va thu lo teh reng em. Kan hnamin kan tawrh nasat turzia hre reng chunga engmah kan ti ngam lo anih chuan he hnam hi hnama din zel tlak kan ni ang em. Lu chhum ban chhum huama, sipai chakna nena sap hovin kan ram an rawn run lai khan kan pi leh pute chuan an ralthuam neih ang angin an lo bei let a. Ralthuamah an ngam ngang lova. Awpbeh kan ni ta a. Awpbeh kan ni chungin chhak lama kan unaute nen kan la inpawh hram hram thei a. Chu pawh chu min chimral tumtute chuan bang chhah tak hmanga min dai dan tet an tum a. Hma an la ta. Ka pu saisawmkap, tiin luchunga kut pharchhuakin i thu thu le kan ti leh mai dawn em ni?
Ni lul love. Mi hrâng sahrâng hmaa zam ngai lo thlahte kha kan la awm alawm kan ti zawk thei em? Kan hmaah mizo hnam nuai bona tur kawng chhawp chhuahin a awm a. Kan en tawp thei dawn em? Khawvelah hian ram tin hi a in siksawi reng a. Hnam tam leh tlem nilovin, a huaisen apiang an dingchang thin. Keini hian kan tlem leh chak loh chhuanlama hmangin dawl zawra kan zawr nghal anih chuan thangtharte chuan vawiin ni a mizote hi min va han haw dawn em. Mahse, chumi hunah chuan phengphehlepa khua a tlai tawh si ang. Khawnge kan hruaitute khan hma han la sela. He hnam kalzelna turah hian political party a kan nihna te dahtha in lungrual takin duh lohna chu a taka penchhuakin i han lantir ang u le.