Aizawl: Health Minister Lalrinpuii hmalaknain Ramachandra Institute of Higher Education and Research, Sastra University Sri Shankara Heart Foundation, Chennai-te chuan February 9-10, 2024 khan Zoram Medical College (ZMC) ah lung tha lo tana a thlawna inentirna, Superspecility Cardiac Camp an buatsaih chuan hlut a hlawh hle.
Superspecility Cardiac Camp-ah hian Chennai atanga lung lam specialist rawn kalten February 9-ah mi 217 leh February 10-ah mi 83, an vaiin mi 300-te lung dinhmun an enfiah a. Lung enfiah zinga 130 chu zai an ngai dawn.
Mi 130 atang hian zai hmasak zual ngai mi 50 thlan an ni dawn a, a dang zai ngai hmuhchhuahte pawh a tahtawla a thlawn a zai tura chhinchhiah an ni a. Sri Ramachandra Medical Instirtiute of Higher Education & Research, Chennai-ah a thlawnin enkawl chhunzawm tur an ni.
Damlote hi an kal lam senso mahni intum tur niin, inenkawlna dang zawng zawng, thlenna leh ei in, damdawi man, test man leh an hawna man hi he hospital hian a tumsak vek dawn a. Hemi hian damlo leh a kalpuitu mi pakhatte a huam ang.
Chennai atanga lo kal doctor-te chuan, “Mizorama chhung district hrang hranga kan doctor-ten lung zai ngai nia an hriat, screening hrang hrang an lo tihtir tawhte chu an ti thain an lo enkawl tha hle a ni,” an ti.
Hetiang camp hi Lunglei lamah October, 2022 khan anni tho hian an lo kalpui tawh bawk.