Inrinni zan khan German Bundesliga-ah inkhel pawimawh tak a awm a, hmahruaitu nih inchuhin hmahruaitu Bayer Leverkusen leh champion lai Bayern Munich an inkhel. BayArena-a inkhel hmuhnawm takah Bayern Munich chu mualneitu lakah an zawr a, si thum fai ngawtin an tlawm. An muala hnehna lian chang Leverkusen hian point ngain hma an hruai fal.
Liverpool leh Real Madrid midfielder hlui Xabi Alonso hnuaiah beisei phak baka khel tha Beyer Leverkusen hian an mualah fiahna hautak an hmachhawn a, champion lai an mikhual. He inkhela chak zawk zawk hi table-a hmahruaitu tur an nih vangin ngaihven a hlawh hle. Inkhel hmuhnawm takah Leverkusen an khel tha chungchuang a, si thum faiin an chak.
Inelna hrang hrangah tlawm nei lova khelh 30 zet kal tluang tawh Leverkusen tan hian Josip Stanisic chuan minute 18-naah Andrich siamsak atangin hmahruaina goal a thun. Hma taka goal an thun vangin inrintawkna sang zawk nen an inlan a, chawlhlawk hnu lamah goal hnih an thun belh leh ta hial bawk.
Si khat faia hmahruai mek Leverkusen tan hian Alejandro Grimaldo chuan minute 50-naah an goal hnihna a thun a, an hmahruaina a tizau. An elpui lian lakah si hnih fai ngawta an hnufual hnuin Bayern in goal thun tumin tan an khawh nasa viau a, inkhel hmuhnawm an lantir. Goal thun tumin tan khawh nasa viau mah se an hlawhtling zo lova, goal an chhuah belh leh ta hial zawk. Hun tawp dawn hnaih minute 90+5-ah mualneitu tan Jeremie Frimpong chuan an goal thumna a thun leh ta mai a. Champion lai lakah si thum fai ngawtin an chak zui ta a ni.
An elpui lian Bayern Munich sawptu Bayer Leverkusen hian khelh 21 atangin point 55 an hmu a, point ngain hma an hruai fal ta chiah. Tarlan tawh angin Leverkusen hi Xabi Alonso hnuaiah an khel tha viau a, khelh 31 zet tlawm nei lovin an kaltluang tawh. Inelna hrang hrang an hmachhawn vawi 31 atang hian vawi 27 zet an chak a, vawi li dang an khigpuite nen an inhnehtawk. Bundesliga-ah vawi 11 zet champion zawn tawh Bayern Munich rorelna tihtawp ngei tumin tan an khawh a, an chetthat em vangin tan pawh an hlawh rih viau bawk.
Leverkusen hi Bundesliga-ah an la champion ngai lova, kum 1996-97, 1998-99, 1999-2000, 2001-02 leh 2010-11-ah pahnihna an lo ni tawh. Season kal mekah hian an champion thei a nih chuan manager Xabi Alonso leh an player te hming hi an club chanchinah a dai leh tawh ngai lo ang.