Public Wo- rks Department (PWD) Minister Vanlalhlana’n Inrinni khan Mizoram PWD hnuaia Kolasib district chhunga hna- thawh hrang hrang tlawhin, a enfiah.
PWD Minister hi Kolasib bialtu MLA, Legislative Assembly Deputy Speaker ni bawk Lalfamkima, bakah Chief Engineer (Highways) Er H. Zoramliana, Chief Engineer (Roads) Er Lalzarliana, PWD Kolasib Division leh National Highway Division-III hnuaia official ten an ṭawiawm a. Hna hrang hrang an ennaah contractor ten lo dawngsawngin, an hnathawh chin an lo hrilhfiah a. Minister chuan hnathawktu contractor-te chu ṭha tak leh chak zawka hna thawk turin a chah.
Bairabi PWD IB-a inkawmhona hun buatsaihah PWD Minister chuan sawrkar tharah mipuiin beiseina an nei sangin, mipui an hlim nia sawiin, ram tana ṭha thei ang ber thlen an tum thu a sawi a. Ministry-in mipui thlawpna an dawng tih an hriatnain chakna a pe nia sawiin, thawhhona ṭha tak nen hmasawnna hmuh tur a awm zel dawn niin a sawi bawk.
Kolasib bialtu MLA, Deputy Speaker ni bawk Lalfamkima pawhin PWD Minister-in Kolasib district tlawha, hna hrang hrang a hmun ngeia a en chu lawmawm a tih thu sawiin, lawm thu a hrilh a. Kawng ṭha nei turin sawrkar ram lak tawh chhuahsan chungchangah mipuite thawhpuina leh thuawihna a pawimawh thu sawiin, mipuite chu ṭha taka sawrkar hmalakna thlawp turin a ngen a. Sawrkar hotu ten ṭhahnemngai leh ṭha takin hma an la chho dawn nia sawiin, an hmalakna ngaichang thiam turin mipuite chu a chah a ni.
Bairabi khawtlang hruaitute leh mipui ten Minister leh Bialtu MLA hnenah hian an mamawhte an lo thlen a. Hortoki-ah pawh khawtlang mamawh hrang hrang sawihovin inkawmhona hun an hmang bawk.
PWD Minister hian PWD NH Division-III hnuaia hnathawh hrang hrang – Rs. nuai 5,310 senga NH-154/6 Kolasib – Bairabi kawngpui (km 89/00 – km 105/00) siamṭhat leh zauh hna thawh mek te, Rs. nuai 1,111 senga Bairabi bul Tlawng kam venhimna tur river training work phase-I hna thawh mek te, Rs. nuai 4,136 senga Meidum to Hortoki kawng phase-I (km 0.00 – km 9.10) siam hnathawh mek te; PWD Kolasib Division hnuaia Rs. vaibelchhe 133.66 senga Meidum to Hortoki kawng phase-II (km 9.10 – km 26.00) siam hna leh lei (bridge) dawh hnathawh mek leh Rengtekawn to Bawktlang Sub-Station kawng siamṭhat hnathawh tur te a en a. Heng hna chungchanga harsatna awmte chu department hotute nen sawihovin, hmalak chhunzawm zel dan tur an sawiho a. Kawng siam hna leh lei (bridge) dawh hna thawh chhunga mipui veivak ten harsatna an tawhlohna tur leh fur ruah tui tlak huna harsatna a awm loh na tura ruahmanna te an sawiho bawk.
Sawrkar thuchuahin a tarlan danin Meidum to Hortoki kawng siam hna phase-I (km 9.10) hi physical work 79.49 thawh zawh tawh a ni a. Phase-II (km 16.90)-ah earthwork leh permanent work package 4 awmin, 91% thawh zawh tawh a ni a, pavement hnathawh ṭan mek a ni a. Lei dawh tur pali awmin, Chhimluangte lui leh Dumkhel lui kaina lei dawh hna chu 23% ve ve thawh zawh tawh niin, Bulung lui leh Damdiai lui kanna lei dawh tur pawh thawh ṭan mek a ni.
Bairabi-a Tlawng lui kam ven himna tur river training work phase-I chu Group 4-ah ṭhen niin, Group-I, Group-III leh Group-IV chu thawh zawh tawh a ni a, Group-II la thawh mek niin, 89.01% thawh zawh tawh a nih thu sawrkar thuchhuah chuan a tarlang bawk.