Aizawl : Sports & Youth Services Minister Lalnghinglova Hmar-in New Delhi-ah Union Sports Minister Anuraj Singh Thakur hmuin, Aizawla SAI Centre, Imphal-a North East Regional Centre hnuaia awm, Guwahati Regional Centre hnuaia sawn chu Mizoramin sports lamah hma a sawn zel theihna tura pawimawh a nih thu a hrilh a. Union Minister chuan Aizawl SAI Centre chu Imphal hnuai atangin Guwahati hnuaia dah a nih tur thu a lo hrilh.
Mizoram Sports Minister-in ‘Khelo India’ hnuaia sports infrastructure siamna atan Mizoramin tunhnai kum hnih chhungin project pakhat chiah a dawn avangin pek belh tura a ngenna pawh Union Minister chuan pek a nih tur thuin a lo chhang niin sawrkar thuchhuah chuan a tarlang a. Lalnghinglova Hmar chuan India-in kum 2036 Olympics thlen a tum chu lawmawm a tih thu a sawi rualin, infrastructure siam ringawt a tawk loh tuh leh tun ațanga infiammi inbuatsaih a țul thu leh a hmanhmawh thlak tawh thu te chu a hrilh a. Union Minister pawhin tha a tih thua chhangin, February 19-ah North East-a Sports Minister zawng zawng hemi kawnga inrawnkhawmna buatsaih nghal a tum tur thu a sawi niin sawrkar thuchhuah chuan a tarlang bawk.
Union Sports Minister chuan Mizoram chu sports lama țan la zel turin a chah a, a thawk țhate tan chuan sorkar laipui a inhawn reng thu a sawi niin sawrkar thuchhuah chuan a tarlang bawk a ni.