Aizawl: Land Revenue & Settlement department chuan department-a thawkten tu hnen atang mahin pawisa leh thil dang an dilin an phut tur a nih loh thu hriattirna an tichhuak.
LR&S depatrtment-in kawng hrang hranga hma a lakna kawngah langtlang, dik leh felfai zawka hna kalpui a tum avangin hriattirna a tihchhuah danin, Mizoram (Land Revenue) Act, 2073 leh Mizoram (Land Survey & Settlement Operation) Act, 200t leh heng dan hnuaia rules-in a sawi ang a, sorkarin lei man (land revenue), chhiah (tax), thil man (fee), etc. a bituk zat bak Land Revenue & Settlement Department hnuaia thawkten tu hnen atang mahin pawisa leh thil dang an dilin an phut tur a ni lo a, an la tur a ni lo.
Sorkar danin a phut ni lo chu, Land Revenue & Settlement Department-a thawkte hnenah tumahin pawisa leh thil dang pek tur a ni lo, department-a thawktu pawhin tu hnen atang pawha dan-in a sawi bak pawisa leh thil dang an lo la a nih chuan an chungah dan angin hremna lekkawh a nih tur thu, hriattirna tihchhuahah tar lan a ni.
Danin a sawi bak pawisa leh thil dang tu hnen atang pawh a dil emaw, phut emaw, la emaw, hria an awm chuan, Lalhmansanga, Joint Director (Admin), Room No. 239, 2nd Floor, Directorate of Land Revenue & Settlement, Khatla, Aizawl-ah emaw, phone number 0389 -2325366/9612131887 ah emaw, email- lhsanga1980@gmail.com-ah emaw hriattir turin an ngen bawk.