Bangladesh rama Rohingya raltlante chuanna lawngleng chesualah mi 14 vel an thi a, lawng hi Bangladesh chhim lam vaukam hnaiha chesual a ni.
He lawngleng hi Malaysia lam pan tur a ni a, Bangladesh-a Rohingya refugee eng emaw zat an camp atanga chuang an awm niin thuneitute chuan an sawi.
Ruangte hi lak chhuah vek an ni tawh a, an zingah hian hmeichhia leh naupangte pawh an awm a. Mi 70 vel chhanchhuah an ni a, eng emaw zat chin hriat loh an la awm bawk nia sawi a ni.
Lawng hi Bay of Bengal-a Saint Martin’s island bul lawka chesual a ni a. August, 2017 khan Myanmar sipaite chuan Rohingya Muslim tam tak suatin an thenawm, Bangladesh-ah hian an tlanchhe nasa hle a. A tam ber hi refugee camp-ah awmin tam tak chuan lawng hmanga Malaysia lam pan an tum thin bawk.
Myanmar ram atangin Rohingya-te hiu Bangladesh-ah an raltlan nasa hle a, Muslim an ni tlangpui a. An tlan chhiatna ramah hian berh taka awmin an awmna hmun a that loh avangin chhiatna pawh an tawk nasa hle.