Myanmar sorkar chuan an rama buaina a tam mek laiin thalai hmeichhia leh mipa zawng zawngte sipaia tan vekna tur dan a neih chu a takin a kalpui dawn.
Sipaite hian February, 2021 khan mipui sorkar paih thlain thuneihna an chang.
Hetih lai hian tun hnaiah an ram chhung hmun hrang hrangah hnam bil hel pawlte leh anmahni duh lotute lakah tlawmin ram an chân nual.
Inrinni khan sipaia tan vekna dan tur hi puangin mipa chu kum 18-35 inkar leh hmeichhiate chu kum 18-27 inkarah kum hnih tak sipaiah an tan a ngai dawn a ni.
An kalpui dawn tih bak kimchanga puan an nei lo va; mahse, sipai sorkar hian an defence ministry-in ‘dan anga thiltih ngai te, kalpui dan tur te, thupek chhuah dan tur te, hriattirna leh inkaihhruaina tur te’ chu a la puang leh dawn tih a sawi.
Tun hnai thla eng emaw zat chhungin sipaite hi hmun hrang hrangah an tlawm nual.
Nikum kum tawpah khan Shan State-a hnam bil hel pawl pathum, sipai sorkar duh lotu pawl dangten an thlawp bawk chuan China nena an inkalpawhna kawngpui ber, ramri kânna leh kawngpui zawng zawng an chhuhsak.
Thla hmasa khan Arakan Army (AA)-in Chin State-a Paletwa an laksak a, Paletwa khaw chhunga sipai hmun an neih chhun ni tawh, Meewa-a tlang chhipa an dah pawh an chhuhsak bawk.
Sipaiten president atana an dah, sipai general hlui, Myint Swe chuan a hmain sorkarin anmahni beitute hi a chhu chimit vat lo a nih chuan an ram chu inphel hrang mai thei a nih thu a lo sawi tawh hial a ni.
Myanmar-ah hian mi tinte sipaia tanna dan hi kum 2010 khan an lo nei tawh a; mahse, tun tum bak hi a taka kalpui a la awm ngai lo.
Dana a inziah dan chuan sipai tan ngei ngei ngaih hun chhung hi emergency lai a nih chuan kum ngaah pawh sei theih a ni a. Sipaia tang tura kohva kal duh lo chu sipaia an tan hun chhung tur lung in tana hrem theih an ni.
Sipai sorkar hian thuneihna an chan hnu lawkah emergency an lo puang tawh a, tun hnai lawk khan thla ruk chhung atan an pawt sei leh tawh bawk.
Myanmar hi kum 50 dawn sipai awpna hnuaia an awm hnuah kum 2011 atang khan mipui rorelna lam a hawi tan.
February 1, 2021 khan sipaite hian an ram an thunun leh ta tih an puang ta thut thung.
Hemi hnuah hian inkaihhruaina mumal lo nghalin anmahni duh lotute nen hmun hrang hrangah an inbei a, mi maktaduai khat chuang baihvaia awm phahin mi sang tel an thi tawh.
Tun hnaia hel pawlte nena indona hrang hranga an chet dan, thenkhata an tlawm leh an inhnuhdawh danah anmahni thlawptute pawh an lawm lo va, sawisel an tawk nasa hle.