Food Civil Supplies & Consumer Affairs Minister B. Lalchhanzova chuan ration card var tana sorkarin buhfaia subsidy a pek thin chu ennawn a nih tur thu leh subsidy-a sum sen thla khatah Rs vbc 3 vel tala tihhniam tum a nih thu a sawi.
Inrinni khan Aizawl Press Club-ah thu thar thehdarhtute kawmin Supply Minister B Lalchhanzova chuan January, 2024-a sorkarin buhfai man atana a senso zat chu Rs 1,56,927,944 niin, heta subsidy a senso zat chu Rs 7,47,58,271 a nih thu leh a phurhman atan Rs vbc 6 vel sen a nih thu a sawi a. Heta tanga sorkarin sum a hloh zat chu Rs vbc 13.47 zet a tling tih a sawi.
Mizoram chu sum leh paiah a pachhiat avangin sum sen titlem zawnga ruahmanna siam a, hmalak a tul tih sawiin B Lalchhanzova chuan, sum leh paia ti tlem turin hmalak a tul thu sawiin, National Food Security Act in a huam loh ration card var neitu te hnena sorkarin buhfaia subsidy a pek thin chu ennawn an tum thu sawiin, “Thla khata sorkarin buhfai mana subsidy-a sum sen chu Rs vbc 3 vel tala tihhniam tum a ni,” a ti.
B Lalchhanzova chuan ruahmanna an siamah card var chu chi hnih-a then an tum thu leh card var nei mi neinung tak ni site chu sorkarin subsidy-a a pek thin chu tihtawp an tum thu a sawi a. Sorkarin Rs 34-a a lei chu Rs 34 thoa pek chhuah an tum thu leh card var pakhat zawk neite erawh kg-ah 34-a lei a nih chuan Rs 27-a khultir tura an duan thu sawiin, thutlukna erawh siam a la nih loh thu a sawi.
Supply minister chuan Mizorama dinhmun harsaten National Food Security Act (NFSA) hnuaiah an chanvo dik tak an chan theih nana hmalak chu sorkar thil tum a nih thu a sawi a. Card dangte pawh nawn a, NFSA-in a huam loh card var nei mek zingah dinhmun harsa zual an awm chuan NFSA huangah, card pawl-ah emaw zawn luh a, card pawl nei zingah NFSA-in a huam loh tur chhungkua an awm chuan card var lama sawn chhoh tumin tun thla chhung hian hmalak tum a nih thu a sawi bawk.
NFSA hian Mizoram state tan mirhing 7,06,296 thun a phalsak a, heng zinga mihring 4,19,934-te chu card vara awm thei tur an nih thu sawiin supply minister chuan, tun dinhmunah Mizoramah ration card nei chhungkaw 2,86,362 awmin mihring 1,167,024 an awm mek tih a sawi a. Heng zingah card eng chu 25,811 awmin, card pawl chu 1,48,711 leh card var chu 1,11,840 a awm mek niin a sawi.
NFSA-in a tum ber chu tumah riltam leh ei tur nei loh hi an tawk tur a ni lo tih a nih thu sawiin supply minister chuan, “Tun hmain ration card chungchangah hian politics avanga thuneihna hman dik loh te, induhsak bikna te chu lo awm tawh thin pawh ni se. Tun sorkarah erawh chuan mi tinin an dikna leh chanvo an chan theihna tur hi kan tum ber a ni. Hun kal tawha thil thlen dan chu eng pawh ni se, politics leh ration card hi kalkawp tawh miah lo se ka duh a. Thuneitu tute mahin ration card hi politics khelh nan kan hmang tawh tur a ni lo,” a ti.
Thu thar thehdarhtute zawhna chhangin B Lalchhanzova chuan khawsak harsa zawkte pawhin an remchan hun hunah ration buhfai an lak theih nan leh mi tinin ration buhfai an lak vek theih nan retailer-te chu thla tluana inhawng tura hriattirna chu sorkarin khauh taka a kenkawh thu a sawi a. Sorkar ruahman anga hma la lote chu thupek zawm tura hrilh thin an nih thu leh mipuite chu phun lungawi mai lova dan zawm lote chu department lama thlen thin tura a duh thu a sawi bawk.