Pathianni zana English Premier League khelhah champion tum Arsenal an khel tha hle a, 6-0 fai ngawtin West Ham United an sawp. Pathianni zana inkhel dangah Manchester United chuan hun tawp dawna McTomminay goal thun hmangin Aston Villa an hneh ve bawk.
- Laipui vawi ruk a puak
London Stadium a lenglut Arsenal an huangtau viau a, Laipui vawi ruk ngawt an hmet puak a, London Stadium-ah Laipui an lawn un un a ni ber mai. West Ham United lakah si ruk fai ngawta an chak hi Arsenal in Premier League-ah Mimuala hnehna an chan chian ber tum a ni nghe nghe a, hnuhma thar an hnutchhiah.
London Stadium-a huangtau tak Arsenal tan hian defender William Saliba chuan minute 32-naah Declan Rice corner pet chu chiang zetin a tauh goal a, hmahruaina goal a thun. Saliba goal thun hnuin Gunners an khel kha chhunzawm a, Laipui a puak zui awn awn. Gunners tan hian England forward Bukayo Saka chuan Rice siamsak atangin an goal hnihna a thun a, an hmahruaina a tizau.
Goal hnih an thun hnuin Mikel Arteta team te an khel tha chhunzawm a, chawlhlawk hmain goal hnih an thun belh leh hman. Minute 44-naah defender Gabriel chuan an goal thumna a thun a. Minute 45+2-ah goal thun lama vannei thei tak Leandro Trossard chuan inringtawk tak chungin a pet goal leh a, si li faia hmahruai chungin chawlhlawk an hmang.
Chawlhlawk hnu lamah Arsenal an khel tha chhunzawm a, goal hnih an thun belh leh. Si li fai ngawta hmahruai tawh Gunners hian minute 63-naah penalty an hlawhchhuah. He penalty hi Saka chuan awlsam takin a pet goal a, an goal ngana thunin, laipui a puak nawn leh. 5-0 ngawtin hma hruai tawh mah se Arsenal in an duh tawk mai lova, goal thun belh tumin tan khawh chhunzawm. Minute 65-naah goal hnih siamchhuak tawh Declan Rice chuan tha zetin a pet goal a, an goal rukna a thun. West Ham captain hlui Rice hian a hlui zahna lantirin a goal thun a lawm duh lo.
6-0 a nih hnuin Arsenal hian goal thun theihna hun tha nei zui bawk mah se goal dang an thun belh thei tawh bik lova, goal rukah an lungawi mai a ngai ta a ni. London stadium-a point thum an hlawhchhuah hmangin Gunners hian an chunga awm Liverpool leh Manchester City an hnaih ve leh sauh a, khelh 24 atanga point 52 hmuin pathumnaah an awm chhunzawm. An chung chiaha awm City nen an point hmuh a inzat mek a. Hammers laka goal ruk an thun hmangin goal difference-ah pawh City an nih rual chiah a, Liverpool aiin an dinhmun a chhe hret thung.
- United chakpuitu McTominay
Pathianni zana inkhel dangah Manchester United chuan Villa Park-a an khingpui Aston Villa chu hun tawp dawn hnaih minute 86-naa Scot McTominay goal thun hmanga hnehin point thum an hmu.
Villa Park-a lenglut United tan hian tunlaia chetha Rasmus Hojlund chuan minute 17-na lekah hmahruaina goal a thun. Hojlund goal thu hi Douglas Luiz chuan minute 67-naah an sut a, an mualah point hmuh ngei an inbeisei hman. Goal thun belh lova an inhnehtawk reng hnuin midfielder Scot McTominay chuan minute 86-naah goal pawimawh tak a thun a, Red Devils in point thum an hmu zui ta a ni.