Thawhtan zinga NBA regular season khelhah Eastern Conference hma-hruaitu Boston Celtics chuan harsa takin Miami Heat lakah hnehna an chang. Thawhtan zinga inkhel dangah Oklahoma City Thunder an chak ve bawk.
Kaseya Centre a inkhel hmuhnawm takah Eastern Conference-a hmahruaitu Boston Celtics in an conference-a pariatnaa awm mek Miami Heat lakah bul an tan tha a, quarter hmasa pahnihah chungnung zawk an ni ve ve. Quarter hmasa berah point liin chungnung zawkah an tang a. Quarter hnihnaah point 5 ngain an chungnung zui leh a, point 9 a hmahruai chungin chawlhlawk an hmang.
Chawlhlawk hnu lamah Heat an insiamtha a, quarter thumnaah point hnihin an chungnung a, an inkar an tizim. Quarter hnuhnung berah an inum zak zak hnuin point thumin an chungnung zui leh bawk mah se point liin an khingpuite an phak lova, point 110-106 niin uiawm takin an tlawm.
Quarter hnuhnung berah hian Celtics in bul an tan tha viau a, point 15 lai ten hma an hruai hman hial. Bul tan tha viau mah se an khingpuite er let an tuar lo teuh hle. Quarter linaa an hmahruaina zawng zawng hloh fai vek mah se chawlhlawk hmaa an khelh that an chhawr tangkai ta, harsa takin hnehna an chang thei hram. Celtics tan hian Jayson Tatum a chetha a, point 26 a thawhchhuah bakah ball sawhlet vawi 10 a dawng a, assist vawi 9 a nei tling bawk a, triple-double a puitlin teuh hle.
Thawhtan zinga inkhel dangah Oklahoma City Thunder chuan an khingpui Sacramento Kings chu point 127-113 in an hneh. Thunder tan hian Shai Gilgeous-Alexander chuan point 38 a thawkchhuak a, Jalen Williams chuan point 32 a thawkchhuak bawk. Vawi hnih an tlawm zawn hnuin hnehna chang leh ta a, Oklahoma City Thunder hi Easter Conference-ah pathumnaah an inhlangkai.