Prime Minister Narendra Modi chuan Thawhtanni khan Haryana tlawhin hmasawnna ruhrel dinna tur lung eng emaw zat phumin hna thawh zawh tawhte a hawng bawk.
Modi hian Jhajjar district, Bhadsa-ah National Cancer Institute a hawng a. He institute hi cancer care-cum-research centre niin AIIMS Jhajjar campus chhunga sak a ni a. Khum 700 awmna niin nuclear medicine hmanga enkawl theihna hmun a ni dawn a, doctor zirlai, cancer leh mi dangte tan hostel room a awm bawk.
Modi hian Faridabad-ah Employees’ State Insurance Corporation’s (ESIC) medical college & hospital a hawng bawk a, hei hi India hmar lama ESIC medical college & hospital hmasa ber a ni nghe nghe a. Khum 510 awmna tur a ni.
Prime Minister hian Panchkula-ah National Institute of Ayurveda dinna tur lung a phum a, in hei hi Shri Mata Mansa Devi Temple Complex-a dak tur niin Ayurveda lama inenkawlna, zirna leh research beihna hmun tur a ni.
Sri Krishna Ayush University, Kurukshetra-a din tur lung a phum bawk a, hei hi Indian system hmanga damdawi lam zirna hmasa ber tur a ni dawn a. Karnal-ah Pandit Deen Dayal Upadhyay University of Health Sciences dinna tur lung a phum bawk.
Heng bakah hian Modi hian Panipat-ah Battles of Panipat Museum sakna tur lung a phum a, he museum hi Panipat-a indona lar tak taktea thil thleng leh hnuhma hluite vawn thatna tur a ni ang.
Prime Minister hian Kurukshetra-ah Swachh Sundar Shauchalay exhibition a tlawh bawk a. Swach shakti 2019 programme hnuaiah hmeichhe khaw roreltu thate hnena Swachh Shakti awards a sem a, Swach Shakti hi hmeichhiate chawikanna tur programme niin khua leh venga hmeichhe roreltu thate ram puma chawimawina kalpui a ni.