Kan sawrkar kal tawhte kan duh khawp lova. Nasa takin mipuiin kan sawisel a. Inthlanah sawrkar kan thlak ta a. Anni hi la sawrkar ngai lo, mithar, beiseina sang tak nena kan thlante an ni. Hmathar lak pawh an tum hmel viauin a lang a. Sawrkar hotute pawh lakluh an nih ni atangin mawngvawm ba ang sekin an phe buaiin a hriat a. A lawmawm hle.
Chutih rual chuan mipuiin kan thlan tlinna chhan hi a sawrkar fawng chelhtute hian an hriat a ngai a. Mipuiin an thlanna chhan hi a hmaa mite tih ang ti lo turin an duh a ni. A hmaa miten engte nge an tiha mipuiin an nin em em? Mahni tanghma inhaivur a, sawrkar sum bawm chu an duh zawng zawng hawia hman hmiah hmiah kha an kalphung kan duh loh lai pakhat chu a ni. Central fund lokal a development fund chu an duhna lam hawiin an pawt kual a. Project eng eng emaw contract induhsakna lam hawi ringawtin an hmang hiau hiau a. A contract thawk tamte thawh chu mimal ang pawhin cheng nuai sing tel tak meuh a ni hlawm a. Mipuiah pawisa a tlem em em a. Sumdawng dawrghakte pawh an hawi ro em em ta mai a. Sawrkar hnathawk pawhin nidanga hlawh an lak ang hunah hlawh an la ngai ta lova. Mipui kan rethei ta tlawk tlawk a ni. Chutiang dinhmuna min hnutchhiah avang chuan mipui chuan a khamin an kham a. Vawiin ni a sawrkarna chelhtute hi an lo dinchhuah phah ta thung a ni.
Sawrkar tharah induhsakna awm lovin, a phu leh tling apiang duhsak an ni ang tih kha campaign laia mipui hnena inzawrhna a ni a. Chu thu ngei chu kan sawrkar hian mipui tan a tihhlawhtlin a ngai a ni. Kalphung tharah chuan thil hi danglam dawrh dawrh turin mipui hian kan thlir a. Danglamna a awm ngei beisei ila. Ni 100 chhunga tihhlawhtlin tur an han puang ringawt pawh mipuiin hahipin an sawi a. Mipuiin an beiseina tihlawhtling tur hian a thu mai nilo, a tak hmuh theih ngei min hlui turin i lo thlir zel ang u. Tupawh sawrkar se a tirah chuan buaina tlem chu an nei theuh thin a. Chumi hre reng chuan mipuiin kan ngaihchan dan hmufiah ngam chungin han che teh se.