Aizawl: MNF party chuan Aizawl By Pass Raod (Sairang – Muallungthu) siamna tura mutmawh hnarmawha neitu, khatih laia chief minister, Zoramthanga inpekna leh hnathawh lo lang chhuak zel chu lawmawm an tih thu an sawi.
Nimina an thuchhuahah MNF chuan February 10, 2024 khan Ministry of DONER kaltlangin, PM-DevINE atanga Aizawl By Pass Road (Sairang – Muallungthu) siamna tur sum, Rs vbc. 500 chu Mizoram sorkar hnena sanction fel a nih thu an tar lang.
MNF chuan Aizawl khawpui chhunga lirthei tawt lutuk tizualtu lian tak chu khawpui chhunga bungraw lian tham phur lo tlan lut thinte a nih fo a vang leh kawngte titlo lotu a nih thu hriain, kha tih laia chief minister, Zoramthanga chuan Aizawl khawpui helna tur kawng siam a tul thu central sorkar hnenah a thlen nasa hle tih tar langin, “Sairang atanga khawchhak lam leh chhim lam panna tur kawng lian siam dan a ruahman a. Chhim lam pan tur kawng hi Sihhmui – Sakawrtuichhun – Tanhril – Tlangnuam – Samtlang leh Lungleng inkarah kalin Muallungthu ramah Aizawl – Thenzawl kawng a pawh ang. He rawtna hi central lam hotute pawhin pawmpuiin Union finance minister pawhin Pu Zoramthanga hnenah tihhlawhtlin a nih tur thu a lo sawi tawh a, Union budget-ah Rs vbc 500 hi a lo dah tawh a ni,” tiin, sanction hmuh a lo ni ta hi lawmawm an tih thu an tar lang.
MNF-in an tar lan danin khawchhak lam panna tur kawng pawh Sairang – Rangvamual ral lehlam – Bawngkawn Brigade field hmar lam atanga leiverh kaw hnih (twin tunnel) awmin, Zemabawk – Selesih kawng, Muthi thlen hma kawn hnuai chhuah lamah a lo chhuak ang a; chuta tang chuan Tuirial airfield hmar lama lui kanin Phaibawk bulah kawngpui fin tur a ni. Hemi atan pawh hian leiverh hna hi tender chhuah fel a ni ta bawk.
“Chief minister kal ta, MNF President Pu Zoramthanga khan vei tak te-a veiin, kawngpui tha leh ramro neihna turte, traffic tawt lutuk tihziaawm te kha tihtakzetin hma a la a, hmalakna lian tham a nih avangin vawi lehkhata peih zung zung theih a ni lo va, thil chhut chiang lo leh hrechiang lo mipui tam tak leh ramhruaitu thenkhat phei chuan nuihzatah te an nei a nih kha,” tiin, a hnathawh rah vawiinah a lo lang chho zel a. Ram tan rohlu tak a nih chhoh zelna turin tuna rorel mekte hian tha tak leh kuttling taka an chhunzawm ngei an beisei thu leh an hnathawh pawh a thlithlai reng dawn niin an tar lang bawk.