Aizawl: Mizoram Police-in nimin khan thuchhuah siamin mipat hmeichhiatna leh a kaihhnawih chungchanga tun hnaia Zolanu leh mi dang pahnih an man chungchang an sawifiah.
Mizoram Police tar lan danin February 8, 2024 khan mipat hmeichhiatna lam kaihhnawih social media-ah a darh nasa tih report an dawng a, an chhuizui nghal.
An chhui zuina atangin mipat hmeichhiatna leh a kaihhnawih hi Instagram hmang thin pakhat chuan mi dang account atangin a live thin tih hriat chhuah a nih hnuah, report an dawn ni vek khan suo moto hmangin rang takin thubuai an ziak lut nghal.
An chhuichianna atang leh electronics evidence atangin he thila inhnamhnawih ni ngeia hriat hmeichhe pahnihte chu darkar 24 chhungin hriat chhuah nghal an ni a, February 10, 2024 zing hma taka man niin, chawhnu lamah jail-ah dah an ni.
An chhui zui zelna atangin he thila inhnamhnawih mipa pakhat chu hriat chhuah leh a ni a, February 10, 2024-ah vek man leh nghal a ni.
He thubuai hi chhui zui mek zel a ni a, a inhnamhnawihte lakah chuan dan angin khauh takin action lak zel a ni dawn a ni.
Mizoram Police chuan mipat hmeichhiatna kaihhnawih lam danin a phal lohte social media-ah pho chhuak lo turin mipui an ngen a, “Khauh takin dan bawhchhiate chungah chuan action lak a ni zel ang,” tiin thuchhuahah an tar lang.