Aizawl: AH & Vety Minister C Lalsawivunga’n nimina ZPM party-in an party pisaa chhung inkhawmah Mizoram chu saah a intodelh loh thu leh a bikin, ran chaw siamna kawngah hmalak hmasak a ngaih thu a sawi.
AH & Vety minister chuan a department chan – Local Administration Department, District Council & Minority Affairs, Art & Culture leh Animal Husbandry & Veterinary Department te hi direct-a mipuite rawngbawlsakna pawimawh tak a nih avangin ralkhat atanga mipuite mamawh en lo va, a bik takin vawk leh bawng bakah ran dang vulhna hmunahte kalin mipuite mamawh leh harsatna te a takin a hmun ngeiah a hmuhpui mek thu a sawi.
Mizoram chu saah, artui leh bawnghnuteah a la intodelh loh thu sawiin C Lalsawivunga chuan, “He mi atan hian hmalakna tur pawimawh tak tak a awm a, a bikin ran chaw siamna kawngah hian hma lak hmasak a ngai hle hle. Thil reng reng a bul thut atanga hma lak a nih loh chuan hlawhtlinna leh intodelhna tluantling a awm thei lo,” a ti.
Ran chaw siamna atana tangkai vaimim leh thlai dangte pawh Mizoramah a thar that duh hle laiin, vawiin thlenga phai lam atangin ran chaw la chaw lut reng maite hi hmalakna tur leh intodelh kawngah ke penna hmasa tur a nih thu a sawi bawk.
ZPM party chhung inkhawm hi Haukhuma Hauzel, IAS (Rtd), Mizoram Resource Mobilization Committee Vice Chairman-in a kaihruai a ni.