Aizawl: Nimin khan India ram chhung hmun dang rualin Aizawla 2nd Assam Rifles hmunah Rozgar Mela (Job Fair) hman a ni a, Union Minister of Law & Justice Arjun Ram Meghwal chuan hna hmu thar mi 18-te hnenah appoinment letter a hlan.
Khuallian Meghwal chuan hna hmu thar appointment letter hlan takte leh an chhungte a lawmpui thu sawiin, ram thang chak tak India rama hna hmu tharte chu ram tana innghahna an nih thute, an lakah beiseina a san thu sawiin, merit atanga teha tithaten dik taka hna an hmuh theih nana hmalak chu sawrkarin a ngaih pawimawh thu a sawi.
Union minister chuan India-in chak taka hma a sawn zel thu leh kum 2047-ah chuan ram changkang, developed country ni thei tura tan a lak thute, tun dinhmunah khawvela ram economy lian pangana a ni mek a, economy lian ber pathumna pawh nih thuai a tum tih a sawi a. Ram chhunga post office-ten hma a sawn chhoh zel thu leh tihchangtlun mek zel a nih thu a sawi bakah culture vawnhim kawngah tanlak a ngaih thute a sawi bawk a ni.
Rozgar Mela hi nimin khan India ram chhung state hrang hranga hmun 47-ah huaihawt a ni a, Aizawla mela neihah hian Ministry of Communication hnuai Department of Post-a hna hmu thar Branch Post Master leh Asst. Branch Post Master, mipa 10 leh hmeichhia pariat, an vaiin mi 18 te hnenah appointment letter hlan an ni.
Rozgar Mela hi sorkar laipui ruahmanna, hna nei lote tana hna siamsakna kawnga hmalakna pawimawh tak niin, hna zawngtu leh ruaituten awlsam zawka hma an lak ho theihna tura ruahman a ni a; hemi kaltlang hian hna hmu tharte hnenah appointment letter sem chhuah thin a ni bawk.