Qatari court chuan Indian lawng sipai officer hlui pariat, eng nge an bawhchhiat hriat chiah lova thi tura a lo tih tawhte chu a chhuah ta.
An zinga pasarihte chu India-ah an let leh tawh niin Delhi-a foreign ministry chuan Thawhtanni khan a sawi.
January khan thuneitute chuan thi tura hremna pek tawh hi tinepin hun inchen lo tak tak tang tura hrem an ni ta zawk tih a lo puang tawh.
Qatar emaw, India emaw hian heng mipate hi eng vanga thiam loh chang nge an nih an puang lo ve ve a. An zavai hian Qatar-a mi mal company, Dahra Global-a thawkte an ni.
Financial Times leh Reuters erawh chuan Israel tana enthlak hna thawka puh an nih avanga man an ni tih an lo tar lang tawh thung.
“Amir of the State of Qatar-in chhuah theiha thutlukna a siama an ram ngeia an lo haw leh hi kan lawm hle a ni,” tiin foreign ministry chuan thu a chhuah.
A sipai hlui mi pariatte man an ni hi kum 2022 khan India-ah chuan chanchinbu tin luahtu a ni.
India hian nikum October khan Qatar-a Court of First Instance-in thi tura a hrem ta mai chuan ‘a barakhaih tak zet’ tih a sawi.
Indian foreign ministry chian hremna pek chu ngaihtuah tha leh tura ngenna a thehlut nghal.
India leh Qatar hi inthian tha tak ram an ni a. Tun hnai lawkah pawh Delhi hian kum 2048 thleng Doha atanga liquefied natural gas lak luhna tur $ tluklehdingawn 78 hu zet inremna a siampui.
Heng mi pariatte man leh hremna pek hian an inthian thatna kar pawh a tichhe hman thelh a; mahse, mi thiamte chuan palai intira indawr a nih hnuah chhuah tura hma lak zui a ni ta niin an sawi.
December khan Indian foreign ministry hian Qatar-a ambassador an dahin lung inah anmahni hi a kawm tih a lo puang tawh bawk.
A hnu thla khatah ministry hian Court of Appeal in Qatar-in thi tura tihna chu a titawp tih puan zui leh a ni.
January khan ministry thupuangtu chuan thi tura tihna hi lung in tantir tura thlak leh a ni tih a puang zui leh a; mahse, eng chen nge ni hlawm tih tak erawh sawi a ni lo va, tunah chhuah zalen an ni leh bawk a ni.