Thawhtan zana English Premier League inkhel awmchhunah Chelsea chuan mikhual an nihna mualah Crystal Palace an hneh a, point thum an hmu ve leh ta. Blues hian Mimualah goal an chhuah hmasa zet naa Gallagher goal hnih hmangin hnehna an chang let.
Selhurst Park ah season kal meka team chetha lo pahnih an inhmachhawn a. 16-naah awm mek Crystal Palace leh table laihawl chhuahsan hleithei lo Chelsea te hian chak an mamawh dun hle. Chak an mamawhna inkhelah Crystal Palace in an hmahruaina an hum zo lova, chawlhlawk hnu lama goal thum ngawt an chhuah tuarin, an tualzawlah ngei an tlawm.
Crystal Palace hian an mualah bul an tan chhe hran lova, goal an thun hmasa. darkar chanve an khel tling chiah tihah Jefferson Lerma chuan hmahruaina goal a thun nawlh. Minute 30-naa goal an thun hmang hian si khat faia hmahruai chungin chawlhlawk an hmang.
Chawlhlawk hmain goal thun thei lo mah se chawlhlawk hnu lamah Chelsea an khel tha ta viau thung a, goal an thun thuai. Second tan atanga minute hnihna lekah England midfielder Conor Gallagher chuan Gusto siamsak atanga goal thunin, an si phurh a sut.
Gallagher goal thun hnu hian goal dang a luh belh thei lawk lova, hun pangngai tawp thlengin chak zawk an awm thei lo. Hun pangngai tawp hnu, hun pek belhah Chelsea an khel tha ta viau thung a, inhnaihchilh takin goal hnih an thun zawn.An goal khatna thun a, an si phurh suttu Gallagher chuan minute 90+1 ah hma an hruai letna goal a thun a. Gallagher goal hnihna a luh hnu lawkah a beisei anga club ah pawimawh zawh tawk loh vanga chhuah a duh ang hiala sawi Enzo Fernández chuan Palmer siamsak chu minute 90+4-ah a pet goal a, an chakna a nem nghet.