India hmar lama police-te chuan an thlai tharte an hralhna tlawm ber tur bi tuk tura sorkar nawr nana Delhi khawpui pan mektu lo neitute hnawh darh nan mittui tlakna an hmang.
Khawpui hi wire hriam (razor wire), cement block leh thil dang hmangin an luh theih lohna turin kil thumah dan a ni.
Sorkar chuan kum 2020-a kum khat zet lo neih kalpui dan thar siam duh lohna lantirna, mi eng emaw zat an thihna ang kha a thlen leh an hlau va, kha dan kha inbiak a nih hnuah sorkarin a hnuk kir ta nghe nghe.
Kum hnih a liam leh hnuah lo neitute hian he inbiaknaa an thil phut tihhlawhtlinsak an tiam thenkhat tihpuitlin a la ni lo tih sawiin hemi kar nan hian an che chhuak tha leh.
India-ah hian lo neitu an tam avangin an lungawi leh awi loh hi inthlana nghawng lian tak nei phak a ni a, mi thiamte chuan Prime Minister Narendra Modi-a hian an lungawi lohnate a haidersak a rem tawh lo niin an ngai a. A kaihhruai BJP sorkar hian hian inthlanpui lo awm turah a zawna a vawi thum nan chak leh an tum mek.
Thawhlehnia thil thleng thlalakah chuan Delhi atanga hmal lam km 200 chuanga hla, Ambala-ah lungawi lote hnawh darh nana mittui tlakna kah chhuah chu a khu chum chum a. Thawhtanni khan police hian Haryana leh Punjab state inrina, Shambhu-ah an lo phuh tawk bawk.
Lo neitu, a tam ber Punjab atanga kal khawmte hian muanawm taka Haryana paltlanga Delhi thlen mai an tum tih an sawi a; mahse, phalsak an ni lo va. Shambhu ramri-ah hian police leh lo neitute hi an innawr nual nia sawi a ni a, boruak pawh a la tang hle.
Kum 2020 khan lo neitute hi thla eng emaw zat an inkulh a, an thenawm state atanga khawpui ber pawhna national highway eng emaw zat an dangchat a. Kha thil thleng khan Prime Minister Modi-a sorkarin chona a hmachhawn lian ber zinga mi nia ngaih a ni.
Thawhlehniah khan Delhi-ah chuan hmun hrang hrangah thuneituten kawngpui an dan avang leh tlan dan an thlak avangin lirthei a jam nasa hle.
Police hian khawpui chhungah tam thama punkhawm an khap bawk a, heng an phal lohna zingah hian Delhi leh an thenawm, Uttar Pradesh leh Haryana state-te nena an inrina, lo neituten an paltlang lai tur nia rinte pawh a tel.
BJP rorelna, Haryana-ah chuan Thawhlehni khan district pasarih ngawtah internet service tihtawp a ni a. Lo neitu pawl hruaitute leh union minister-te vawi hnih lai indawr mah se an intilungawi zo rih chuang lo.
Lo neitute hian sorkarin an thlai tharte chu a man hniam ber tur, minimum support price (MSP) a tuksak an phut a, hei hi sorkarin a thunun wholesale market (mandi)-a an hralh theihna tur a ni a. Hei bakah hian sorkarin an sum lak luh a leta tihpun a tiam chu tihlawhtling se an ti bawk.
Thawhtanniah khan union minister-te leh lo neitu pawl hruaitute chu darkar ruk zet an inbia a. Lehlam lehlam hian an thil phut thenkhatah chuan lungawina an hmu thei a, heng zingah hian kum 2020-a thil thlenga lo neitute laka thubuai ziah luh hnuhdawh pawh a tel.
MSP chungchangah erawh an inrem thei lo va. Kum 2021-a farm law hnuh kir a nih hnuah khan sorkar hian thlai man bi thliahtu tur panel din a tiam a; mahse, tun thlengin he committee hian an thil hmuh an la report lo.
Tun tuma Delhi pana kawng an zawh lehnaah hian lo neitu pawl 200 chuang an tel a. “Engmah tibuai lovin kan kal dawn a, kan duh ber chu sorkarin kan thil phutte hi ngaithla se tih a ni,” tiin Punjab Kisan Mazdoor Sangharsh Committee General Secretary Sarvan Singh Pandher chuan ANI news agency hnenah a sawi.
Lo neitu leh sumdawng pawlte pawhin February 16 hian thingtlang lamah nawrh an huaihawt dawn bawk a, hemi ni hian lo lam hna engmah an thawk dawn lo va. Thingtlanga dawr, bazar leh pisa zawng zawng kharin ram pumah kawngpui pawimawhte an dang dawn a ni.