Chief minister Lalduhoma’n tuna Mizorama consultancy firm zawng zawngte chu March 31-ah a tawp vek dawn a, a thar registration tih hun an hawng dawn tih a sawi a, fake account-te chu an man zel dawn tih a sawi bawk.
Nimin tlaia chanchinbu mite a kawmnaah zawhna chhangin chief minister chuan, “Tuna consultancy firm nei zawng zawng hi March 31 khian a tawp vek dawn a, kan titawp vek dawn a. April atangin inziah luhna hun hawn leh a ni ang a, thalaite hmakhua ngaiin awlsam zawngin tih a ni ang,” a ti.
Contractor nih dan awlsam an zawng dawn tih sawiin, contract-a eizawng duhten contractor an nih theih dan awlsam an zawnsak a ngai a, an inbuatsaih mek tih a sawi a, sub contract thawh dan turte an ruahman tur thute a sawi rualin hetianga ruahmanna thar an siam chhoh chhan chu Mizorama hna lian zawng zawng Mizo kutah luh tir an tum vang a nih thu a sawi.
Chief minister chuan social media-a mahni hmel tilang loa fake account hmanga mi bei thinte chu an man zel dawn tih a sawi a, “Fake account hi chhui chhuah theih loh niin ngai ta ila, kan ti tam tual tual dawn a, party leh party mai a ni dawn lo, mi mal leh mi mal inkarah pawh finfiah tak tak theih si loin in beihna a awm dawn a, society a tichhe dawn,” a ti.
Tun hnaia fake account neitu an man chungchang sawi bawkin, “Sorkar hmasa hun laia ka complaint a ni a, an chhui chhuak zo lo a, kan sorkara kan chhui chhuak mai, kan chhui chhuak zel dawn,” a ti a, cowboy-in an huat ber chu hnung lam atanga inkah a ni tih leh an ngam chuan inhmachhawn tur a nih thu a sawi.
Chief Minister Duhoma chuan tun hnaia Assam chief minister nen an inkawm chungchangte pawh sawiin, Assam leh Mizoram ramri buai hi sawi fel a nih hma chuan tu lam ve ve mahin buaina siam loh nise an tih thute, buaina a chhuah palh pawhin beng dai vat nise tia an sawi dun thu sawiin, buaina chhuah hun nghak loin a buai loh laia ramri chungchang sawi fel turin hmalak a ni tih a sawi.
Sorkar laipui hotute nen an inkawmna chungchangte pawh sawiin minority affairs hnuaiah sum pek an tum thu an lo hrilh a, DPR pawh an theh lut chawp chuk chuk a, chutah chuan Vanapa Hall sak thatna turte a tel thu a sawi a, Free Movement Regime leh border fencing chungchangte pawh union home minister a sawipui a, he an inkawmnaah hian titawp lam sawi loh mah se beiseina sang tak an neih thu a sawi.
Mizoram chhim lama oil zawn chhuah dan dap pui tura minister-te a ngen thute, tui herh haw anga mahni in chhunga gas hman tur herh haw a nih ve theihna tura kawng dap chhoh zel an tum thu leh hemi chunchang pawh hmalak dan turte pawh an sawi ho thu a sawi a ni.