Aizawl: Sava chi hrang hrang 142 leh thehlei chi hrang hrang pasarih tihlumtu mi pathumte chu Central Jail-ah khung an ni.
Sava leh thehlei tihlumtute hi Lalchhuanawma (33), Tlungvel Venghlun, HS Thangkhuma (68), Tlungvel Vengthar leh Lalthazuala (41), Tlungvel Venghlun, Aizawl district mi vek an ni.
Tlungvel khuaa cheng mi pathumte hian Tukhumvilik 108, Vahui 10, Tuklo 10, Kawlrit 10, Hlei-kapsen pathum, Kulherh leh Liandorit pakhat ve ve bakah Vate, Hlei-lubial leh Hlei-meipar pahnih theuh an tihlum a ni.
February 10, 2024 khan EF&CC department hnuaia Seling Forest Range leh Tawi Wildlife Sanctuary staff te chuan joint patrolling neiin an pathum khian Tlungvel kaw daiah an sava leh thehlei kah hlumte bakah an kah hlumna hmanruate nen zan dar 9 velah an nangching.
Hemi zan hi Inrinni zan a nih avang leh a tuk Pathianni a nih avangin February 12, 2024-ah Aizawl Wildlife Division office-ah in-report tura hriattir an ni a. Hemi ni vek hian magistrate hmaah hruai nghal niin, Central Jail-ah dah luh nghal an ni.
An kut atang hian Air Rifle pahnih leh a mu bawm khat, SBBL pakhat leh a mu 15 bakah hand pump (air pump) pakhat mansak an ni bawk.
An sava leh thehlei kahna hmun hi Phulmawi ram, Zawngsih hmun niin, a kaptute hian an sawina a, Tawi Wildlife Sanctuary hnaih lam a nih avangin sanctuary chhung a mi a nih leh nih loh chhui chian mek a ni.
Sava leh thehlei tihlumtute hi Wildlife Protection Act Section 9, 31, 34, 36, 39 leh 51 tlawhchhana man an ni. Kum thum thleng Jail tan leh Rs 25,000 chawitir theih a ni. Febeuray 26, 2024 khian court-ah an inlan leh ang.