Season thar atana inbuat-saihna kalpui mek Inter Miami-in Hong Kong khuaa tualchhung league eleven an infiampui tumin an ticket lei chhan ber Lionel Messi chu sawilawk loin a inlan lo tluanchhuak ringawt a, a hnu lawkah Argentine hi Tokyo friendly match-ah a inkhel leh lawi si a, Chinese official-te an lungawi thei lo a, an rama Argentina-in friendly match hnih khel tura inremna an lo kalpui tawh pawh an hnukkir hmiah!
Ruahman lawk ang chuan thlathar mai hian Beijing khawpuiah world champion Argentina hian Africa champion thar Ivory Coast chu friendly match an khelhpui ang a, Afcon final-a chak zo ta lo Nigeria nen Hangzhou lamah an inhma-chhawn zui leh ang tih a ni a, hei hi China chuan Argentina cap-tain laka an thinrimna hrikthlak-na atan an cancel ta a ni.
Hong Kong friendly match en tum khan Chinese fans singli zetin man to takin ticket an lei a, inkhel tan hma lawkin an chan ber Me-ssi inlan loh tur thu an hre chawp-chilh chauh a, mipui thinrim chuan Inter Miami club neitu pa-khat David Beckham-a thusawi lai an boo khum a, Messi pawh dim chuang loin an boo bawk!
Kum 36 mi Argentina captain hian nithum hnuah Vissel Kobe hmachhawnin Tokyo khawpuiah bench thawhsanin khelmual a lut leh thei si a, Chinese mite an lungawi thei ngang lo a ni ber.
Messi hian Hong Kong-a khelmual a luh theih loh chhan kha a thal bawr nat vang a nih thu sawi chungin thupha a chawi a, he thupha chawina hi Chinese fans leh official-te’n an pawm lo.
Hong Kong friendly match huaihawttu Tatler Asia chuan ticket an hralhchhuah atanga 50% chu peklet (refund) theih a nih thu an puang hial tawh a ni.
Hong Kong friendly match ticket kha pakhat Hong Kong dollar 5000 (USD 639) a tling.
Inrinni khan Beijing FA chuan thuchhuah siamin, “Tun din-hmunah chuan Lionel Messi tel-na tur match reng reng kan ram chhunga khelh turin Beijing-in ruahmanna a nei lo,” an ti hmiah!
A hma ni chiah, Zirtawpni khan an khaw sports bureau lamin Hangzhou match pawh an lo hnukkir tawh bawk.