Aizawl: Commerce & Industries Minister F Rodingliana’n nimin zingkar khan Aizawl New Market building sak mek tlawhin hnathawhte a enfiah.
Aizawl New market building sak mek a tlawhnaah Minister F Rodingliana chuan, bazar building sak mek hi mipuite nghawng tak tak thil anih avangin a ngaih pawimawh thu leh chak zawka hnathawh a tul thu a sawi a. Hnathawh mekte uluk taka vil tur leh quality control uluk turin a enkawltu department hotute a chah a, contractor te pawh chak zawka hnathawk tur leh harsatna an neihte a tul anga hmalak ho zel a tul thu a sawi.
Building sak mek chu a hmangtu tur mipuite tan veivah a awlsam zawk nan leh rikrum thila chet a awlsam zawk nan a tira ruahmanna chu building a len em avangin, building tin inkalpawh theih turin ninister hian department hotute leh engineer te ruahmanna thar siam belh turin a ngen a, he ruahmanna ang hi chuan inkalpawhna siamna tur zawn zel stall awm tura ruahman chu paih a tul dawn avangin, stall awm tur zat pawh a hma aiin a tlem hret dawn a, hei hi mipuite him zawk nan a nih avangin tih ngei ngei erawh a tul tih a sawi bawk.
Bazar seat leh stall changtuten mi dang hnenah an hralh chhawng thin nia sawi awm chu a ngaih pawimawh thu sawiin Minister han, Commerce & Industries Department thuneitute chu lo enfiah turin a chah a, thil tidik lo an awm chuan allotment cancel-sak thlenga hma la tura hrilhin, hetiang ti thin hria chuan department thuneitute hnena report turin minister hian mipuite a ngen a ni.
New Market-ah hian building pahnih – Smart City Mission hnuaia City Centre leh Commerce & Industries Department hnuaia sak City Centre Annexe te sak mek a ni.
City Centre Project hi Rs nuai 4,035 man niin, he hmunah hian dawr 1,105 a awm thei dawn a, lirthei ke li nei 31 leh lirthei ke hnih nei 79 dah theih tura ruahman a ni a. Cold storage, CCTV, Service life leh Office te ruahman a ni. Ground floor leh basement bakah floor 7 awm tura ruahman a ni bawk.
City Centre Annexe building sak mek hi Rs nuai 3,641.59 man a ni a, dawr 135 awm tura ruahman niin, hawker 183 thu thei tura ruahman a ni. Lirthei ke nih nei 219 leh lirthei ke li nei 69 dahna bakah thawktute chenna eng emaw zat sak tur a ni bawk.
Minister F Rodingliana hi Isak Malsawma, Chairman MAMCO, Florence Zotluangpuii, Director Commerce & Industries Department, CC Lalchuangkima, CEO, Smart City Project leh official dangten an tawiawm a ni.