Aizawl: NGO Coordination Committee, Mizoram chuan sorkar laipuiin Myanmar leh India inrinna hung a tum leh ramria chengte inkalpawh tawh theihna, free movement regime (FMR) tihtawp tum a tum chu ngaihtuah tha leh turin union home minister an ngen.
Mizorama tlawmngai pawl lian hrang hrang intelkhawmna, NGOCC chuan FMR leh border fencing chungchang ngaihtuah tha tura an ngenna memorandum hi email hmangin union home minister hi an thawn a, nimin khan NGOCC hruaitu thenkhatin memorandum hard copy chu Mizoram larsap hnenah an theh lut leh bawk.
An lehkhaah chuan India sorkar chu FMR thiah leh border fencing siam a tum chungchangah UN Declaration on the Right of Indigenous People (UNRIP), 2007-a hming ziah hnantu ram a nih angin international border-in a then hran chibilte chungchang chu ngaihtuah chiang turin an ngen a, India sorkarin ramria inkalpawhna dan tihtawp a tumna leh ramri hung a tumna chu titawpa ramria inunauna tha zawk a awm theihna tura hma lak ni se an duh an tar lang.
Hemi kawnga an hmalakna chungchanga zawhna chhangin NGO Coordination Committee chairman, Central YMA President Lalhmachhuana chuan FMR tihtawp leh ramri hung hian Mizote inkar tichhetu a ni thei tih leh insumdawn tawnna kawngah pawh nghawng tha lo a nei thui hle dawn nia an hriat avangin he hmalakna hi an duh lo tih a sawi.
Lalhmachhuana chuan sorkar laipuiin FMR thiah leh border fencing a tum an dodalna in a awmzia a nei lo a nih pawhin mipui pungkhawm zawnga lungawi lohna lantirte pawh a la tul thei tih a sawi.
Mizoram chauh lo, Myanmar ramri nei Nagaland lam pawhin sorkar lapui hmalakna hi an duh lo a, Naga lam hruaitute nen pawhin dawrin hmalak hote pawh an tum tih a sawi a. FMR leh border fencing chungchangah hian Mizoram sorkar pawhin hma lain central hotute pawh an dawr nia an hriat thu sawiin, state sorkar chu chak zawka hma la zel turin an beisei tih a sawi bawk.
NGOCC-in union home minister hnena memorandum an theh luh hi Mizoram governor leh chief minister te pawh an pe ve bawk a ni.