Inrinnia president thlan tuma inbuatsaih mek, Nigeria-ah president tang lai, Muhammadu Buhari-a campaign-naah chhiatna lian thlengin pungkhawmte an innek buai a, mi 14 an thi.
Chhiatna hi an ram chhim lama Port Harcourt khawpuia thleng niin stadium chhunga President Buhari-a thu sawi ngaihthlak tuma gate-a inhnawh mipuite chu an innek buai ta chiam a ni.
Nigeria-a mipuiten Inrinnia president thlang tura vote an thlak turah hian Buhari pawh hian a term hnih nan a chuh leh a. Vice-President lo ni tawh thin, Atiku Abubakar chu a khingpui lian ber tura ngaih a ni.
He chhiatna hi nimin chawhnua Adokiye Amiesimaka stadium-a President Buhari-an thu a sawi atanga rei lotea thleng niin tualchhung chanchinbute chuan an sawi a. Nunna chân tam ber hi gate inkalha luh luih tum, miin an nek thluk, an chil zui takte an ni hlawm a, chhiatna a thlen hnu lawkah hian Buhari hian a chhuahsan zui ve nghal.
Hliam tuarte chu damdawi inah lak an ni a, a hnuah Buhari-a office chuan All Progressives Congress (APC) party miten chhiatna lian tak tawk leh thihna a thleng pawi an tihzia an sawi zui.