Nilaini zing khan NBA 2023-24 regular season khelh chhunzawm a ni a, Eastern Conference hma-hruaitu Boston Celtics chuan an khingpui Brooklyn Nets chu point 118-110 in an hneh. Celtics tan Jayson Tatum a vul chhu-nzawm zel. Nilai zinga inkhel dangah Miami He-at in Milwaukee Bucks an sawp.
Eastern Conference hmahruaitu Boston Celtics hian an conference-ah 11-naa awm mek Brooklyn Nets lakah bul an tan tha viau a, quarter khatnaah point rukin an chungnung nghal. Quarter hnihnaah khel tha chhunzawm in, point 9 in an chungnung zui leh a, point 15 a hmahruai chungin chawl-hlawk an hmang.
Chawlhlawk hnu lam ah Celtics an khel tha chhunzawm a, quarter thumnaah point khatin an chungnung zui leh. Point 16 zetin hma hruai tawh mah se quarter hnuhnung berah point 8 in hnufual zawkah an tang ve thung a. Point riata hnehna chang zui thoin, Eastern Conference-a an hmahruaina an sawh nghet. Nets laka hnehna an chan hi vawi nga an chak zawnna a ni a, season kal mekah vawi 42 chakin, vawi 12 tlawm zawkah an tang ve tawh.
Brooklyn Nets an hneh tum hian Celtics player pawimawh Jayson Tatum a khel tha viau a, point 41 zet a thawhchhuah bakah ball sawhlet vawi 10 zet a dawng tling bawk. Tatum hian season kal meka inkhel tinah point 27.3 zel thawkchhuak ang a ni a, Celtics tan a vul vet vet hle.
Nilai zinga inkhel dangah Eastern Conference-ah pathumnaa awm mek Milwuakee Bucks chuan an khingpui Miami Heat chu point 34 zetin an sawp a, hnehna nuamsa an chang. Heat hi an player langsar pathum; Jimmy Butler, Terry Rozier leh Josh Richardson te tel lovin an inlan a, Bucks lakah chetthat an harsat.
Inkhel dangah Oklahoma City Thunder chuan 127-113 in Orlando Magic an hneh. Orlando an hneh tum hian MVP tura rinkai zinga mi Gilgeous-Alexander a khel tha leh viau. LeBron James point 25 thawhchhuahna inkhelah Los Angeles Lakers chuan point 125-111 in Detroit Pistons an hneh ve bawk.