Aizawl : Election Commission of India thuchhuak bawhzuiin Champhai District-ah nimin atang khan EVM leh VVPAT te endik hna (First Level Checking) kalpui tan a ni a, tun thla ni 15 thleng a awh ang.
Electronics Corporation of India Ltd(ECIL) Engineer pathum ten Election official-te leh political party hrang hrang aiawhte enpuina hnuaiah EVM leh VVPAT te hi Lok Sabha inthlannaa hman tlak a nih dawn leh dawn loh an endik dawn a ni.
District Election Officer James Lalrinchhana chuan inthlan felfai leh thianghlim tak an neih theih nan political party aiawha EVM leh VVPAT te endik chhunga duty tur te chu thahnemngai lehzual zawka thawhpuiah a sawm a. An chanvo te tha taka hlenchhuak turin a ngen.
Inthlan fefai tak an neih theihna tura venhminna hnathawktu Police Department chungah pawh lawmthu a sawi a. District chhunga sawrkar hnathawk leh NGO te inpeknaah pawh lawmthu sawiin, inthlanna felfai tak an neih theih nana thawhhona tha neih a pawimawh thu DEO chuan a sawi bawk.
Deputy DEO M. Misael, Supervisor ni bawk pawhin MLA inthlan neih zawh takah party mi te nen thawhhona tha tak an lo neih tawh thu sawiin, thawhhona tha chu chhunzawma MP inthlan an hmachhawn turah pawh ram leh hnam tan a ni tih hre reng chunga an chanvo te phur taka ti zel turin a chah.
Election Officer Benjamin Zalawma Ralte-in a sawi danin Champhaiah hian Ballot Unit – 142, Control Unit – 140, VVPAT – 154 endik tur a ni a. EVM leh VVPAT endikna paltlangte chu uluk taka chhin- chhiah niin, venhminna hnuaiah khawih danglam theih loh tura strong room-a kalhhnan zel an ni.