Congress hotunu, Sonia Gandhi chu kum 25 zet hnuah Lok Sabha a kalsan dawn ta a, Rajya Sabha lamah a insuan dawn.
Kum 77 mi, Gandhi-i hian Nilaini khan Rajasthan-a Rajya Sabha inthlan turah a hming a pe lut a, a dinna bial hi prime minister hlui leh an party hruaitu hlun, Manmohan Singh-a bial thin niin ani hi kum 50 zet politics-a a inhman hnuah a chawl ve dawn a ni.
Gandhi-i hian an party thatna, Amethi, Uttar Pradesh leh Karnataka-a Bellary bial atangin inthlan chuh hmasa berin a tling ve ve a. Hei hi kum 1999 kha niin a pasal, Prime Minister Rajiv Gandhi-a thah a nih atanga kum riatnaah a ni.
Kum 2004 khan Congress thatna tho, Uttar Pradesh-a Raebareli-ah a insawn leh a ni.
Congress hi kum 1999 atang khan an party president niin a kaihhruaina hnuaiah hian an sorkar a ni.
Gandhi-i hian kum 2004 atangin Raebarelli hi a la chhuahsan leh ta lo va, vote tla zinga 55% aia hniam a la hmu lo va. Kum 2014 leh 2019-a Prime Minister Narendra Modi-a kaihhruai BJP-in chiang taka an party an paih thlak lai leh Rahul Gandhi-a ngei pawh Amethi-a a chak loh lai pawhin ani chu a tling zel a ni.
A bial a chhuahsan dawn takah hian tu nge an dintir dawn tih sawi a awm nghal a, a fapa, Rahul-a chu a ni dawn lo nia sawi a ni a. A fanu, Priyanka Gandhi Vadra chu sawi rik a ni zawk a, he bial hi a pi, prime minister hlui, Indira Gandhi-i atang tawha an chhungkaw bial niin a vawi khat nan Vadra-i hian inthlan a chuh ve dawn em tih zawhna a awm mek a ni.