Shah Alam, Malaysia a khelh mek Badminton Asia Team Championship-ah India mipa leh hmeichhe team ten tha takin bul an tan. India mipa team in Hong Kong an hneh nghal a. Hmeichhe team in team hlauhawm China an hneh nawlh bawk.
India mipa team hian Hong Kong hmachhawnin bul an tan a, bul an tan tha hran lo. Mimal inkhelah India aiawh HS Prannoy chu Hong Kong aiawh Ng Ka Long Angus lakah 18-21, 14-21 in a tlawm nghal. Mimal inkhel hmasa berah tlawm bawk mah se India tan hian Lakshya Sen chuan a khingpui Yin Chak Chan chu 21-14, 21-9 in a hneh ve thung a, 1-1 a ni ta chiah. Mimal inkhel hnuhnung berah Kidambi Srikanth chuan 21-14, 21-8 in Jason Gunawan a sawp zui ve leh a, 2-1 in hma an hruai let.
Hmahruai zawka tang India hian doubles-ah a khel tha zui viau a, hnehna an chang zawn. India tana inkawp Satwiksairaj Rankireddy leh Chirag Shetty te chuan an khingpui Lui Chun Wai & Yeong Shing Choi te chu 21-16, 21-11 in an hneh a. An chakna nemnghet turin MR Arjun leh Dhruv Kapila te inkawp chuan Chou Hin Long & Hung Kuei Chun te chu 21-12, 21-7 in an sawp zui ve leh bawk a, 4-1 a hnehna changin, bul an tan tha hle.
Mipa lamah India in bul an tan that rualin hmeichhe team pawhin bul an tan tha viau bawk. India hian champion tura rinkai, team hlauhawm China an hmachhawn. India tan hian PV Sindhu a inlan hmasa ber. Hliam vanga chawl reng Sindhu hian khingpui hautak Han Yue lakah a khel tha viau a, minute 40 chhungin 21-17 21-15 in hnehna a chang hman a, India in 1-0 in hma an hruai phawt.
Sindhu chak hnu hian double lamah Tanisha Castro leh Ashwini Ponappa te inkawp chu Liu Sheng Shu leh Tan Ning te inkawp lakah 19-21 16-21 in an tlawm a, 1-1 a ni. 1-1 a nih hnu hian mimal inkhel lamah Ashmita Chaliha chu Wang Zhi Yi lakah 13-21 15-21 in a tlawm leh a, champion tura rinkai China lakah India na hnufual ta chiah.
Tlawm thei dinhmun derthawng taka an din laiin a tha zawngin India tan hun a inher. Treesa Jolly leh Gayatri Gopichand te inkawp chuan Li Yi Jing leh Luo Xu Min te inkawp lakah set an hloh hmasak zet hnuin 10-21 21-18 21-17 in hnehna an chang let a, 2-2 a ni ve leh ta chiah. 2-2 a nih vangin mimal inkhel lamah inkhel pawimawh tak a awm chhunzawm. India tan World ranking a no 472-na Anmol Kharb chuan World No. 149 Wu Luo Yu lakah mak tak maiin hnehna a chang a, China lakah India a chakpui nawlh.
Hmeichhe lamah Idia leh China te hi Group G-ah an pahnihin an awm dun a, hnehna an chang hmang hian knockout round an lut chiang nghal a ni.