Motor Vehicle Inspection (MVI) hotuten tun hnaiah lirthei insurance chungchangah inbumna avangin police station-ah FIR theh luh a tam thu an sawi a. Mipuite chu fimkhur turin an chah.
Nimina MVI hotute kawmtu The Zozam Times an hrilh danin, tun hnaia lirthei an endik atangin insurance fel nia inngai, Vahan-a endik a nih hnua lo fel ta lo tam tak an awm thu sawiin, “Hei hi lirthei neituten an insurance tihnate rinawm loh vangin harsatna an tawk nasa hle niin kan hria,” an ti.
MVI hotute chuan, “Insurance agent-te hian lirthei neitu thenkhat hnenah tlawm taka insurance ti thei nia inzuarin, Rs 7,000 emaw, Rs 10,000 emaw vel chauha insurance lo leitirte an awm thin a. Hetia an inleitir hnuah agent-ten lirthei neitute document chu Vahan-ah hun reilo te chu an tilang a, rinawm deuh angin an update chu hmuhin an inlantir a. Mahse, enfiah (check) an tawha Vahan-a insurance tihna lo lang ta si lo tam tak an awm a, a hnuah lirthei neitute buaizui ta an awm thin a ni,” tiin, buaina tawk tam zawk chu sumdawnna atana hman lirthei neitute an nih thu leh, heng zingah Police Station-a FIR theh lut an tam thu an sawi bawk.
Lirthei document-te chu ram pumah Vahan atanga en theih veka tar lan a nih thu sawiin MVI hotute chuan, “Vahan-a lehkha pawimawh lang lo chu a valid tawh loh vang a ni a. Chuvangin, lirthei neitute chu insurance a ni emaw, lirthei document dangte pawh an update that a, an ngaih pawimawh a tul a. Man tlawm ringawt um lova rintlak ngeiah chauh insurance tih thin a pawimawh a ni,” tiin The Zozam Times an hrilh.
MVI hotute chuan lirthei neitute hian document an nei felfai tha em tih ngai pawimawh se an duh thu an sawi a. Hei bakah lirthei neituten, a bikin, sumdawnna atana hman lirthei khalhtu leh enkawltuten an phurh theih aia tam phur (over load) thin lo tura an duh thin thu sawiin, “Mi thenkhat hian dan pela thil an phurh kan va mansakte hi dan an hriat tawk loh avangin min sawisel fo thin a. A bik takin, lirtheiin a phurh theih aia tam phur chunga tlan lui kan mante hi, man châk leh tum hrim hrim vang angah thenkhat chuan min puh thin a, hei hi thu dik lo a ni. Danin a phal bak aia tam phur chu man theih an nih bakah, lirthei khalhtu leh mipui himna kan ngaih pawimawh vang zawkin kan inman thin mai zawk a ni. Lirthei neitute leh a khalhtute hian dan zawm hram hram turin kan duh a ni,” tiin an sawi bawk.