Aizawl: MNF chuan nimin khan thuchhuah siamin, Free Movement Regime (FMR) thiah leh ramri hung tura hmalakna na taka an dodal zel tur thu an tar lang.
Sorkar kalta MNF kaihhruaiin a do tlat chu sorkar thar neih a chinah, tun hma atanga central sorkarin tih a tum chu na leh zualin hma an la ta tih tar langin MNF thuchhuah chuan, “Myanmar nena kan inrinaa zalen taka khawsak theihna, FMR a siam pawh Manipur chief minister duhdan angin a rawn titawp nghal a. Ramri hung hna pawh thawh a tum nasa hle tih hriat a ni zui bawk,” tiin an tar lang.
MNF chuan sorkar neih mek, ZPM chu central-a BJP kaihhruai sorkar hian a zuam hle nia an ngaih thu tar langin, “A zuamna turin tun inthlanpui kan hmachawn lai khan puanhnuai thil an nei a nih ngei pawh a rinawm hle a ni,” an ti.
FMR leh ramri hung chungchanga chief minister tanna leh thusawi thin chu hi rinhlelhawmin ngaihthatthlak loh an tih thu leh duap aw pu-ah an ngaih thu sawiin, India ram hotu luber venghimtu nia a lo insawi tawh thin chu tun hun hi huai taka a hman hun turah an ngaih thu an tar lang.
MNF chuan central sorkar hmalakna kal mek FMR tihtawp a ni chu na taka an do zel tur thu leh hemi avanga Zo hnahthlak unau, Myanmar lam leh Mizoram lama ramri depa cheng mekte harsatna an tawh meknaah a rang thei ang bera sukiang tur leh, ramri hung tura hmalakna kal mek pawh tuna ramri hi barhluih ramri a ni tih pawma central sorkar hnena titawp tura na taka hma la nghal turin Mizoram sorkar an ngen tih an sawi.
A hunlaia thil thleng, khawchhak lama Zo hnahthlak thenkhatte khawsak phung avangin ram mipuiten khawchhak lam atanga lo chhukte ninna nasa tak a awm avangin ramri hung tul tihna hi alo awm tawh thin thu tar langin, “Tlawmngai pawl thenkhat pawhin umchhuah kawngah sorkar nawrin, nasa takin hma a lo la tawh a nih kha. Chuvang chuan MNF chuan Assembly ah hial bill pu lutin, alo pass tawh a. Bill pass chu a hmalak tawp chin niin, kan unaute nen inpumkhatna a taka kalpui kawnga harsatna siam thei a nih tih hria in, hemi kawngah hian MNF kaihhruai sorkar chuan hma a la zui ta miah lo a, tun sorkar kaltaah pawh hemi kaihhnawih kan unau rawn raltlante kutzung chhinchhiahna siam (Biometric Enrollment) ti tura central sorkar nawrna pawh Cabinet meetingin alo hnawl tawh bawk,” MNF chuan an ti.