Indian Prime Minister Narendra Modi chuan United Arab Emirates (UAE)-a ni hnih a cham chhungin Hindu temple lian tak a hawng dawn.
Abu Dhabi-a BAPS Hindu Mandir hi ram acre 27-a zau, UAE sorkarin a pek hmunah sak a ni.
India hian kum 2018-a Modi-a’n UAE a tlawh tum khan sak a nih tur thu a puang a ni.
Mi thiamte chuan thla hnih emaw hnu leka India-a inthlanpui lo awm turah Hindu nationalist-ten kawngro a sut phak viau an ring.
Modi-a hian tun hnai lawkah Hindu pathian, Ram-a puala sak, Ayodhya-a temple a lo hawng tawh bawk a. He temple hi kum zabi 16-na hun laia mosque ding, Hindu-ten kum 1992-a an chhut chhiat tak hmuna sak a ni a, mosque chhut chhiat tuma buaina chhuakah khan mi 2,000 dawn an thi nghe nghe.
Abu Dhabi-a temple hi BAPS Swaminarayan Sanstha enkawl a ni dawn a, anni hi ‘thlarau leh inpekna nena kal’ nia inchhal niin ‘Hindu rinna, an thawh leh khawvel muanna’ chawi nun an tum ber niin an insawi.
An pawl hi kum 200 chuang zet chanchin lo nei tawh an ni a, Modi-a chawr chhuahna, Gujarat-ah hmunpui an nei.
UAE-ah hian temple hi a awm nual tawh a, tun tuma hawn tur bik erawh hman lai tihdan (traditional technique) hmanga din hmasak ber nia sawi a ni.
Rajasthan-a tlaklei senno leh Italian marble var hmanga sak niin India-ah a tul ang zawng zawng an duan hnuah Dubai-ah hian remkhawm leh mai a ni.
India leh UAE hi ram inthian tha tak niin an insumdawn tawnna pawh $ tluklehdingawn 85 hun daih a ni a. UAE-a ram dang mi awm zinga a tam ber pawh Indian an ni a. Abu Dhabi-ah ngei pawh hian Indian Hindu za tel an cheng a ni.
Modi-a hi UAE-ah hian khawvel huap ram hruaitu intawh khawmna, World Governments Summit-a tel tura kal a ni.
Thawhlehnia a thlen hnu lawkah UAE president nen an inkawm nghal a. Indian external affairs ministry chuan investment lam leh eibar lama thawhhona tur eng emaw zat an siam niin a puang.
Heng inremnate hi energy security leh sumdawnna leh digital infrastructure tihhmasawnna lam thil turte a ni.
Modi-a hi Abu Dhabi-a Indian-te hnenah pawh thu a sawi a, UAE president hnenah hian temple dinna tur ram a pek avangin lawm thu a hrilh bawk.