Thawhleh zana Championship khelhah Leicester City chuan an mikhual Sheffield Wednesday chu si hnihfaiin an hneh a, point 12 zetin table-ah hma an hruai fal tawh. Foxes an chak laiin Southampton erawh Bristol City lakah an tlawm thung a, pathumnaah an tlahniam ve thung.
Hmahruaitu Leicester City hian table hnuai lama awm mek Sheffield Wednesday chu King Power Stadium-ah an mikhual a, hun pumin inkhel thunun zawkah an tang tluan. Foxes hian an mualah bul an tan tha hle a, inkhel tan atanga minute lina lekah Fatawu Issahaku chuan hmahruaina goal a thun a, Striker tawnhriat nawh Jamie Vardy chuan minute 36-naah an goal hnihna a thun zui leh bawk a, chawlhlawk hmaa an goal hnih thun hi an chakpui.
EPL atang tlahniam hlim Leicester City hian championship season kal mekah vawi 32 khel tawhin point 78 an hmu a, point 12 ngawtin hma an hruai fal tawh. An khelh that tluan em vangin Premier League lamah an kir leh a rinawm hle. An hnuai chiah awm Leeds United in point 66 an hmu mek a. Pathumnaa awm Southampton vawi khata khel tlem chungin point 64 an hmu mek bawk. EPL atanga tlahniam pathum ten table chung pathum an luah mek.
Thawhleh zana inkhel dangah pathumnaa awm mek Southampton chu Bristol City lakah 3-1 in an tlawm. Bristol lakah an tlawm vangin Saints hi pahnihna atangin pathumnaah an tlahniam. Championship-a pakhatna leh pahnihnate direct in EPL-ah an kai sang dawn a, pahnihna nih phak a hlu hle.