February 13, Thawhleh zan khan UEFA Champions League last 16 khel tan a ni a, champion lai Manchester City leh UCL a hnuhma nei tha ber Real Madrid ten hnehna an chang. Champion lai City hian 3-1 in FC Copenhagen an hneh a. Club ropui Real Madrid in ai khat faiin RB Leipzig an hneh ve bawk.
Champion lai leh champion leh tura rinkai Manchester City hi FC Copenhagen hmachhawn turin Parken, Copenhagen-ah an lenglut a, mikhual an nihna mualah bul an tan tha hle a, chawlhlawk hmain goal hnih an thun hman. City tan hian inkhel tan atanga minute 10-na lekah Kevin de Bruyne chuan Phil Foden siamsak atangin hmahruaina goal a thun. Hliam hliam vanga chawl reng De Bruyne hi a kir leh hnuin a che ropui nghal hle a, midfielder tha bik a nihzia Dermark club lian lakah lantir chiang hle.
FC Copenhagen hi Manchester United chungah awm a, last 16 lut thei ngat kha an ni a, ngaihnep ngawt theih an ni lo. Team lian City lakah goal chhuah hma viau mah se ngaihnep theih an ni lo tih khawvel an lantir nawn leh a, an khel tha zui ta tlat. Minute 33-naah Magnus Mattsson chuan goal thunin an si phurh a sut. An muala Manchester United hneh thei an nih vangin City pawh hneh thei tura ingaihna lian tak an nei a, inringtawk takin an mualah an inlan. Mualneitu lam phur lutuk khap dai turin City pawhin theihna an nei tih an lantir thuai a, Bernardo Silva chuan minute 45-naah De Bruyne siamsak atangin hma an hruai nawn lehna goal a thun a. 2-1 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm viau a, goal erawh a lut har hle thung. Goal a luh belh dawn lo emaw tih hnu minute 90+2-ah Phil Foden City goal thumna a thun a, an chakna a sawh nghet. Foden goal thun hnu hian goa dang a luh belh tawh lova, City chuan mimualah 3-1 a hnehna changin quarter-final an hnaih leh zual. City leh FC Copenhagen te hi Etihad Stadium-ah second leg khelin an inhmachhawn zui leh dawn a. Denmark club tan Etihad Stadium-ah inlehthalna lian thlentir a harsa viau tura ngaih a ni.
Thawhleh zana inkhel dangah Champions league-a vawk lal len a, UCL ta neih thiam riau Real Madrid chuan Red Bull Arena, Leipzig-a an khingpui RB Leipzig chu Brahim Díaz goal thun hmangin an hneh a, quarter-final an hnaih ve kuarh bawk.
Real Madrid hi an lenluhna mual Red Bull Arena-ah an khel tha viau a, Mimuala inlan mah nise inringtawk taka inlan in, nuam ti takin German club an hmachhawn. Los Blanco hian chawlhlawk hmain goal thun thei bik lo mah se, chawlhlawk hnu lamah goal an thun thuai thung. Second half tan atanga minute thumna lekah Brahim Díaz chuan Carvajal siamsak atangin goal a thun a, a goal thun hi an chakpui zui ta a ni.